Frederic van Balnckenhem bi der genaden Goits bisscop tUtrecht maken kont allen luden dat wy onse land van drenthe overmijds versettinge onss huss tot Coverden gevonden hebben in groter bezwaernisse van geweltliken saken die an hem gekeert ende daer sy mede gekroedt ende gedronghen worden van den voirscreven huys tot Coverden als mit roeff, brandt, vengnisse, doetslaginge, schattinge ende anders menygerhande bezwaernisse die hem geschieden tegen hoer olde gewoente ende landrechte des onse guede lude ende ondersaten van Drenthe clagede desse voirscreven gewelde van ons begeerden, dat wy thuys van Coverden aen ons lossen ende sy van den gewelde beschudden ende beschermen ende yn oeren olden rechten holden wolden als wy schudich weren te doen. Ende want wy onsen gueden luden ende ondersaten van Drenthe, die ons tot onser kercken ende nacomelingen behueff lieflich ende gunstlich gehuldet hebben toe ewigen daghen guede gestichtslude te bliven, die voirscreven geweltlike saken gerne afnemen solden, so hebn wy nae ynholt der apenne bezegelder brieve, dee wy in verwaerijnge ende holtnisse onser clesie ende onser stat van Utrecht gevonden hebben, ons verboden dat voirscreven huys to Covorden te loessen ende te betalen sulc gelt dair onse voirvaerre, bisscope tUtrecht datselve huys voir versat hadden ende hebn dairtoe gedain nae ynholtnisse der voirscreven brieve als dairtoe behoerlich was ende hebben ons angenomen dieselve onse land ende lude van Drenthe te bevreden te beschermen ende yn gueden stade weder te brenghen als wy schuldich sijn te doin. Ende updat sie niet meer also belast noch mit gewelde veronrechtt en werden so hebben wy hem geloeft ende loven in gueden trouwen voir ons ende voir alle onse nacomelinge bisscope tUtrecht dat wy sonder verkorten soelen holden ende beschermen yn alle oere olden lantrechte, wilkoren, vryhede ende gewoente als sy van oeldesheer gebruckt hebben. Ende voirt hebben wy voir ons ende onse nacomelinge bisscope tUtrecht hem gegeven ende geloeft te holden sunderlinge sulke punten als hierna bescreven volgen: In den yrsten dat wy onsen lande van drenthe soelen seynden enen wyebisscop hoer kercken. altaren ende ornamenten te wyen om alsulc loen ende cost als wy anders onsen gestichtsluden doen. Item, solen wy tot allen tiden gelijc onse voirvaders bisscope t Utrecht gedaen hebben den deken van drenthe macht geven die lude te absolveren van saken die een bisscop van Utrecht tobehoren te absolveren also als van olds gewoenlich geweest heeft. Item, soe en soelen wy noch nyemant van onsen ondersaten dagen noch citeren mit onsen noch onss officiaels brieve yemant uyt den alnde van Drenthe verre dan tot Hulsforde of tot Bisscopsberge. Ende weeert dat sulke brieve quamen in Drenthe die solen wesen ydel ende sonder macht ende geen priester en deerff die brieve vervollighen noch die mandate exequiren. Mer hieraff sijn uytgenomen saken ruerende van onsen leengueden onsen tafelgueden ende van onsen hoerigen luden na ynholt der brieve die dairaff in voirtyden gemaect sijn ende beholdelic oic onser ecclesien oer ouder gewoente nae ynhoudt derselver ouder brieve. Item, solen wy ende onse nacomelinge mit gansen ende gueden trouwen verantworden ende beschirmen alle onse lude persone ende ondersaten des lands van Drenthe voir alle persoen beyde buten Stichts ende bijnnen Stichts na onser macht gelijc anders onsen gestichtsluden sonder enygerhande argelist. Voirt solen alle lude onss lands van Drenthe van desen dage voirt tollvry varen ebnde comen te watere ende te lande voir allen onsen tollen. Item, wy ende onse nacomelinge en soelen genen scolt noch ampt,man tot Coverden setten noch yn den lande van Drenthe buten raede noch tegen wille onser dryer hoefsteden van Sallant als Deventer, Campen ende Zwolle ende des lands van Drenthe. Item, en soelen wy gene slote tijmmeren noch hebben in den lande van Drenthe anders dan thuys tot Coverden, sonder argelijst. Item, en solen wy den Vryesen genen scade doin noch doen laten doer dat landt van Drenthe tegen wille des lands voirscreven. Item, sulke brieve alst landt van Drenthe mit den vriesen, mit den Ommelande ende mitter stat van Groenijngen te samen hebben soelen bliven in oerre macht alsoverre als die niet en sijn tegen ons noch onser kercken rechte. Oic en soelen wy den lande van drenthe voirscreven gene precari off bede meer eysschen noch tlant meer schatten dan onse voervaerre gedaen hebben, alle argelist hier uytgesproken. In orkonde des hebben wy onsen segel voir aen desen brieff doen hangen. Ende omdat wy willen dat dese zaken ende alle puncten voirscreven stantaftich ende vast solen bliven tot ewigen dagen zoe hebben wy gebeden eerbern wysen bescheiden luden prelaten ende capittelen onser kercken van den Doem, Oude Munster, sente Peters. sente Johans ende sente Marien tUtrecht ende scepenen ende raede onser dryer hoefsteden van Salland als Deventer, Campen ende Zwolle desen brieff mit ons te besegelen. Ende wy prelaten ende capittelen vanden Doem, Oude Munster, sente Peters, sente Johans ende sente Marienkercken tUtrecht ende wy scepene ende raede van Deventer, Campen ende Zwolle ansiende dat die eerwerdige in Gade onse lieve genedige heere van Utrecht voirscreven den voirscreven lande van Drenthe dese voirscreven punten van doechden ende om orbaer sijns gestichts gegeven ende verleent heeft hebben desen brieff um sijnre beden wille mit onser kerken ende onser stede segelen mede doen besegelen tot enen meerren getuge ende vestnisse deser voirscreven saken. Gegeven int jaer ons Heren duysent CCCXCV up onser Vrouwen avond Assumpcio.
