Johan die Tutener en zijne vrouw Armegaerd dragen, in overleg met hunne kinderen Godicken, Johan, Wenemer en Margarete, over aan de abdij van Dickenijnghen eene pacht van 3 ¹/2 vierendeel boter, ongedeeld in de Esinghe-pacht op Hakeswolde in het kerspel van Blydensteden, gekocht van Harman heer van Kuenre en zijne vrouw Mechtilt dochter van Boldewijn van der Ese. Met medebezegeling door Johan heer van Rune, ridder.

Allen denghenen, die dessen brief solen sien oft horen lesen, doe wy verstaen, Johan die Tutener ende Armegaerd, mijn echte wijf, ende enkennen apenbaer mit dessen openen brieve, dat wy mit vryen willen ons selves, mit raede Godickens, Johans, Wenemers ende Margareten, onser kindere, ende mit consent al onser erfghenamen erfliken vercoft ende upghelaten hebben, vercopen ende erflike oplaten apenbaer mit dessen openen breve hern Johan, den abt ende ghemenen convent van Dickenijnghen vierdehalf vierdel boteren jaerliker pacht, rorende in die Esinghe pacht, onverscheyden, die gheleghen is op Hakeswolde bijnnen den kerspel van Blydensteden, mit alsulken rechte, als die voerscreven pacht ghekoft wart tieghen Harmanne, heer van Kuenre, Mechtilde, sijn echte wijf, Boldewijns dochter van der Ese, die die voerscreven pacht to boren plach, um ene summe van ghelde, die ons wittelike ende wal betaelt is, in alsulken manyren, dat die abt ende convent van Dicke-nijnghe desse voerscreven boterpacht erflike ende ummermeer vry besitten ende bruken moghen sonder enigherhande wedersegghen van ons ende van onsen erfghenamen, ende solen hem der boterpacht voerscreven to lantrechte waren voer al dieghene, die daer to rechte op spreken moghen, al arghelist uutghesproken. In kennisse der waerheit heb ie, Johan die Tutenar voerscreven, desen brief beseghelt mit minen seghele voer my selven , voer Armegaerde, mijn echte wijf ende voer onse kinder voerscreven, want sie selven ghene seghele en hebben. Ende um ene meerre vestenisse desser vorworden heb wy ghebeden enen eersamen ridder, heren Johanne van Rune, onsen heren, dat hy dessen brief voer beseghelen wille mit sinen seghele. Ende wy, Johan, here van Rune, want desse boterpacht voerscreven bijnnen onser heerlicheit gheleghen is ende desse oplatinghe voer ons gheschiet is, hebbe wy om bede willen Johans des Tuteners, Ermegarde, sines echten wives, ende oerre kindere voerscreven onsen seghel voer an dessen openen brief ghehanghen tot enen ewyghen waren tughe alle desser vorwarden voerscreven, int jaer ons Heren dusent driehondert vier ende seventich des Sondaghes nae sunte Victors misse gheheten Sandghanghen.

x

x

Archief	Drents Archief
Fonds	Arch. Abdij Dikninge
Toegangsnummer	440
Inventarisnr.	1
Fol.nr.	fol. 19v
Regestnr.	94
Jaar	1374
Datumcode	DpGerVic

x

x

Materiaal	perkament

x

Edities	O0627