Gheert to der Hofstede schulte in het kerspel van de Ywehorst oorkondt, dat Euerd Guedesinghe, zijne vrouw Lyze, Eernst van Yselmuden en Elsebe e.l overdroegen voor een edel eigen aan de abdij van Dickenynghe hun goed gelegen ter Hofstede genaamd der Bozesteren-gued en het goed, waarmee Johan Kijppingh zich vrij kocht, beide in het kerspel van de Ywehorst, bezwaard met eene rente van l Engelsche te Zwolle up der vünten te betalen. Met medebezegeling door Euerd en Eernst.

Ic, Gheert to der Hofstede, in der tijd een ghesworen schulte mijns heren van Uytrecht in den kerspel van der Ywehorst, bekenne in dessen openen brieve, dat voer my ghecomen is int gherichte in enen ghehegheden heymale, daer ic dat gherichte sat to der Hofstede, Everd Guedesinghe, Lyze, sijn echte wijf, Eernst van Yselmuden ende Elsebe, sijn echte wijf, ende bekanden daer voer my, dat sie voer hen ende voer hoer rechte erfghenamen in enen steden vasten erfkope erfliken ende eweliken vercoft hadden den abbate, prior, priorinne ende den ghemenen convente van Dickenijnghe hoer gued, dat sie ligghende hadden ter Hofstede, gheheten der Bozesteren gued a), ende dat gued, daer hem Johan Kijppingh mede vrycofte, mijt hoghen, mit syden, mit egghen, mijt eynden, mit torve, mit twyghe, mijt watere, mijt velde, mijt alre slachter nod ende mijt alle sinen rechten tobehore, alsoe als dat gheleghen is in den kerspele van der Ywehorst, voer ene summe gheldes, die Everde, Lysen, sinen wive, Eernste ende Elzeben, sine wive, voers. van de abbate, prior, priorinnen ende den convente van Dickenijnghe voerscreven wittelike ende wal bitaelt is. Ende Everd Guedesingh, Lyze, sijn wijf, Ernst van Yselmuden ende Elzebee, sijn wijf, voerscreven vorteghen daer voer my, voer hem ende voer hoer erfghenamen van dessen voerscreven erflike ende ewelike to behoef des abts, priors, priorinnen ende des conventes van Dickenijnghe voerscreven ende droghent hem up mijt vertichnisse ende uplatirighe, alse ordel ende recht wysede, alsoe dat dit voerscreven gued den abbete, priore, priorinnen ende den convente van Dickenijnghen voerscreven erflike ende ewelike vast te blyven sal ende dat Everd, Lyze, sijn wijf, Eernst ende Elzebee, sijn wijf, voers. of hore erfghenamen of nement van hore weghen daer meer op te spreken oft te wachten en hebben. Voert soe hebben Everd, Lyze, sijn wijf, Eernst ende Elzebee, sijn wijf, voers. den abbete, prior, priorinnen ende den convente van Dickenijnghe voers. ghelovet voer hem ende hoer erfghenamen dit voerscreven gued te waren voer een edel eyghen voer al dieghene, die daerup to spreken hebben ende des to rechte comen willen, woe sie dat van rechte schuldich sin te ware, uytgesproken enen Enghelschen, die men daer jaerlix to Zwolle up der vunten afbytaelen sal, al arghelist hierinne uytghesproken. Hier waren an ende over als koernoten Everd to der Lanchorst, Willem to der Lanchorst, Heyne to der Hofstede ende anders gueder lude ghenoech. In oerkunde des ende om bede willen van beyden zyden, want ic, Gheert to der Hofstede voers., hierover ghestaen hebbe als een richter, soe heb ic
in een tuych der waerheyt mijn zeghel beneden an dessen brief ghehanghen. Ende want wy, Everd Guedesinghe ende Eernst voerscreven, willen, dat den abt, prior, priorinnen ende den convente van Dickeninghe voerscreven desse vorwerde stede ende vast bliven solen, soe hebben wy onse seghele beneden an dessen brief ghehanghen voer ons ende voer Lyzen ende Elzeben, onsen twier wive, alse voer munbaers ende voer onse rechte erfghenamen. Ghegheven in den jaer ons Heren dusent drehondert achte ende neghentich quinta Kalendis mensis Junii.

x

x

Archief	Drents Archief
Fonds	Arch. Abdij Dikninge
Toegangsnummer	440
Inventarisnr.	1
Fol.nr.	fol. 35r
Regestnr.	128
Jaar	1398
Datumcode	5KalJun

x

x

Materiaal	perkament

x

Edities	O0989