Wolter van den Toren schulte te Hasselt oorkondt, dat Johan die Witte en zijne vrouw Alijt overdroegen aan de abdij te Dickenynghe eene rente van l vierendeel boter uit het goed van Wolter to der Hofstede in het kerspel van de Ywehorst. Met medebezegeling door Gheert ter Hofstede Wz.
a) Ic, Wolter van den Toren, in der tijt een ghesworen schulte mijns heren van Utrecht in der stad to Hasselt, make kond alien luden, dat voer my ghecomen is in gherichte in enen ghehegheden heymale, daer ic dat gherichte sat binnen Hasselt, Johan die Witte ende Alijt, sijn echte wijf, ende bekanden daer voer my, dat sie voer hem ende voer hoer erfghenamen in enen steden vasten cope erflike ende eweliken vercoft hebben den abt, der priorinnen ende den ghemenen convente van Dickenijnghe een vierendeel boteren jaerlix over Wolters guet to der Hofstede in den kerspel van der Ywehorst voer ene summe gheldes, die Johanne ende Alide sinen wive voerscreven van den cloester van Dickenijnghe vors. wittelike ende wal bitaelt is. Ende Johan ende Alijt voerscreven verteghen daer voer my, voer hem ende haer erfghenamen van desen vierendel boteren erfliken ende eweliken to behoef des abts, der priorinnen ende des convents van Dickenijnghe voerscreven ende droghent hem up mit ver-tichnisse ende mit uplatinghe als ordel ende recht wisede, alsoe dat Johan ende Alijt voerscreven of hoer erfghenamen an desser voerscreven boteren niet meer te spreken oft te wachten en hebben. Voert soe hebben Johan ende Alijt voerscreven ghelovet den abte, der priorinnen ende den conven(te) van Dickenijnghe voerscreven dese voerscreven botere te waren vry, ledich ende loes voer alle ansprake alle dergheenre, die daerup spreken willen mit yenighen rechte, als sy dat mit rechte schuldich sin te waren. Hier waren over ende an alse koernoten Johan van Strokele, Tydeman, sijn broeder, Johan ten Hove ende anders gueder lude ghenoechu In oerkunde der waerheit ende om bede willen van beyden syden, want ic, Johan van den Toren voerscreven, hierover ghestaen hebbe als een richter, soe heb ic in een tuych der waerheit mijn seghel an dessen brief ghehanghen. Ende want ic, Gheert ter Hofstede, Wolters sone voers., bekenne, dat alle dese voerscreven dinghe warachtich ende gherechtich, soe heb ic dessen brief mede open beseghelt mit minen seghele. Ghegheven in den jaer ons Heren MCCCC des Woensdaghes na Alreheyligendaghe.
