| Nummer:gus0042 | Datum:26. April 1465 | Overlevering:Original | Vindplaats:Rep. 1 (Große Urkundensammlung), inv.nr. 0042 |
Die Häuptlinge Snelger in Uphusen und Haro und Haiko in Oldersum tragen ihre Herrlichkeiten dem Grafen Ulrich I. von Ostfriesland zu Lehen auf.
Wy Snelgher, hovetlingk to Uphusen, Hare unde Hayke, ghebrodere, to Oldersum hovetlinghe, bekennen unde betughen openbaer ende dosen kundich allen edellen strenghen duchtighen ersamen erbaern unde wisen vromen lueden, wertlich edder gheistlick, dat wy deme edellen vormoghenden heren, greve Ulryke to Norden, Grietzyl, Emeden, Awrike etc., heren in Oestvrieslande, hebben ghelovet ende ghesworen eme unde synen kynderen truwe ende hoelt to wezene, syn unde syner kindere beste to done, daertho argheste to kerene myd lyve unde gude, waer wy konnen ende des mathe unde mach nach all unsen vormoghe, alz gude manne eren rechten heren schuldich syn to done, unde wy all unse herlicheyt ende rechticheyt van eme to lene hebben entfanghen, zoe alz gude manne pleghen van ereme rechten heren herlicheyden nemen tho lene. In oerkunde der waerheyt hebben wy Snelgher, Hare unde Hayke vorben. unse inghesegele kentlyken myd gueden wyllen ghehanghen an dessen brieff. Ghegeven to Emeden, na der bort Christi unses Heren dusent vierhundert, darna in deme vif unde sestighesten jare, ame vrygdage nae sunte Marcus des hilgen ewangelisten daghe alrenaest.
x
| Archief | NStA |
|---|---|
| Fonds | Rep. 1 (Große Urkundensammlung) |
| Toegangsnummer | R001 |
| Inventarisnr. | 0042 |
| Jaar | 1465 |
| Datumcode | VpMarci |