Focko Ukena verkauft das Gut Brahe an Engelbert von Langen.

Ick Herman Herdinck geheten de Schu^otte an der tyt eyn sworn richter to Meppen van gnaden myns gnedigen heren, heren Hinricks van Moerse, bischop to Mu^onster, enkenne unde betuge openbaer in dessen breve, dat vor my in gecomen an eyn heget gerichte, dar ick den stoell myt rechte besetten hadde, Focke Ukens to Leer unde enkande vor sick unde sine erven, dat he myt willen unde vulbort frowe Iden syner echten huesfrouwen unde sinen rechten anervenden hadde verkofft unde verkoffte rechtliken unde redeliken enes steden, vasten, erffliken, ewigen kopes Engelberte van Langen, synen erven offt holdere desses breves unde sinen erven, de hove toe Brae, [*] lude unde guedt, myt alle eren rechten tobehoringen oelt unde nye, myt toppe, myt twige, so als de belegen syndt in deme kerspele van Rede unde gerichte ton Nyenhus; unde leitt up myt hande unde myt mu^onde Engelberte van Langen vorg. de vorg. hove, lude unde guedt in ene upbornde hebbende besittende brukende wer, unde vertech up alle ansprake al vor my in den sulfften gerichte, de he oft sine ervent hadden gehatt offt hebn mochten jenigerleye wys an den vorg. hove, lude unde guderen, unde hadde dat gedaen vor ene summe geldes, de eme van Engelberte vorg. all unde wall betalt ys, als he enkande an denselfften gerichte. Vortmer so will unde sall Focke vorg. vor sick unde sine erven Engelberte vorg. unde sinen erven offt holdere desses breves myt sinen willen der vorg. hove, lude unde guderen, gude vaste erfflicke wairschap doen, wair, wanner unde so vakene, als eme des noet were vor allen, de des to rechte komen willen unde by namen in leenware, alle argelist, dar men dessen breff mede hinderen offte krencken mochte, tovorn uthgesproken. Hir weren an unde over Wilbrant Schade unde Steven van Hede kornoten[*] des gerichtes, Otto Schade, Hermen van Meppen unde ander guder lude genoch, de dat gerichte mede bestonden unde hoerden. Unde des to bekantnisse, dat dit allent war ys unde vor my in gerichte gescheen, so heb ick Hermen eyn richter vorg. van gerichtes wegene myn ingesegel an dessen breff gehangen, unde ick Focke vorg. to merer bekantnisse unde vestnisse dessen breves, so heb ick myn ingesegel myt ingesegel des richters vor my, myne erven unde anerven mede an dessen breff gehangen. Datum anno Domini M^o CCCC^o XXX^o sexto, ipso die Georgii martyris.

x

x

Archief	NStA
Fonds	Rep. 1 (Große Urkundensammlung)
Toegangsnummer	R001
Inventarisnr.	0413
Jaar	1431
Datumcode	Georgi

x

x

x

Edities	Editie naar dit exemplaar: oub0454.