Aufzeichnungen über die Lehnsverhältnisse des Gutes Brahe.

Wy Diderich[*] van Gotz gnaeden abt der fryghen stichten ind steden Sunte Ludgers, Werden ind Helmstede, doin kunt ind bekenne in dusseme brieve vor uns ind unse nakomelinge, dat vor uns gekomen in dey edell ind wolgheboren junker Uko, greve in Oistvreislandt, myt eynem vulmechtigen besegelden brieve van der edelen Theda syner vrou moder, junckeren Ennen ind Edzardt synen broederen, selligen greven Ulricks mylder gedechtnysse soene, gegeven etc., ind uns oetmodigen gebeden hevet, oen myt deme hove to Brae myt all syner gerechticheit ind toebehoringe, dar hie ind syne broedere vurscr. segghen sey rechte erffgenamen to wesen, ind dat in medebehoiff syner moder ind brodere vurscr., tot oiren rechten mede to belenene etc., soe hebben wy aengheseyn syne oetmodige bede ind begerte, ind hebben den vurscr. junkern Uken in medebehoiff syner vrou moder ind broderen vurscr. beleent ind belenen in crafft dusses brieffs myt deme hove to Brae, myt all syner toebehoringe ind gerechticheit, als myt deme huess Reseken, domo Brederen, domo Sifridi in Wallagen[*], domo Lumberten Sopenteil, domo Verdeken in Berwale[*], domo Sifridi, domo Swenken, domo Hermanni Volleren ibidem, domo Lyffhardi de Wich, curia dicta Velthoff in Reide[*], domo Lyffhardingh, domo Gerhardi tont Slote ibidem, domo Wesseli, domo Hokyngen, domo Werners in Herbraem[*], domo Scregikinken, domo Lambertingh, domo Rewerdingh in Asschendorp, domo Suesen in Eyndorp[*], mansione in Tuncestorpe[*], domo in Smerlike[*] myt oiren toebehoringen, to dienstmansrechte deme vurscr. junkeren Uken, syner vrou moder ind broderen vurscr. tot oiren rechten, uns ind unsen stichten tot unsen rechten, ind iderman synes rechtes darane unvertogen, dar uns junker Uko greve vurscr. up gedayn hevet huldinge ind ede gesworen lyffliken ton hilgen, ind gelovet Gode van hemelrike, deme guden heren sunte Ludger, synen stichten ind uns truwe ind holt to wesene, als eyn dienstman synen heren in schuldich to wesene. Hyr over ind ane synt gewesen die eirberen ind veste Jurgen Asschebroick, droest, Johan van Tytz, richter tor tyt to Werden, Roseir Duker, Johan Huge, dienstman sunte Ludgers, ind meir lude genoich; ind dys to tuge der wairheit so hebben wy Diderich abt vurscr. vor uns ind unse nakomelingen unse abdiensegel an dussen brieff doin hangen. Gegeven in deme jaire unses Heren dusent vyrhundert drey indtachtentich, up dinsdagh na octavas epiphanie Domini.

x

x

Archief	NStA
Fonds	Rep. 1 (Große Urkundensammlung)
Toegangsnummer	R001
Inventarisnr.	0420
Jaar	1483
Datumcode	MpoEpipha

x

x

x

x

Edities	Editie naar dit exemplaar: oub1106.