Wy Thede, grevynne in Ostvrieslandt, don kondt unde bekennen apenbare in desser scrifft vor allen unde eynen itlicken besunderen, de dessen unssen openen besegelden breff seen offte horen lesen, dat Johannes de schriver tor Vredeborch unde Lutke Johan van uns noch van jemande van unser effte van unsser kindere edder unsser lande weghene neen ghelt, grot offte luttick, hebben entfanghen noch geboert, unde en ock nichtes ghelovet en waert, umme dat de Vredeborch mochte kamen to unser ende unser kinder ende landen unde Heren Ommekens selighen heren Syben sones handen, sunder den knechten unde schryver vorscr. tor Vredeborch waert ghelavet unde ghegheven eer vordende loen, soldye unde schaden, den se by Syrke gheleden hedden unde he eme schuldich was ghebleven, den en itlick voerdende unde satte by synen eede, de eynen itlick betalet unde ghegheven wardt unde anders nicht. Ock en hebben se van Syrkes vangenen schattinge nichtes upgeboert, de knechte samtliken unde Johannes erb. hebben endrechtliken de Vredeborch upgheantwordet unde ghegheven in Syrkes rechte ervent handen ende were, by namen in mester Tyaerdes, kerckheren to Aurike, Syrkes brodersone, Haren Syrkes broder unde Folkerdes Syrkes unechten sones handen, welke erffnamen effte erven de vorbenom. Vredeborch uns, unssen kinderen unde Heren Ommeken vortan hebben overgheantwordet unde upghelaten myt guden willen. Dat desse vorscr. puncte unde articule aldus in der warheydt ghehandelt unde ghescheen synnen bekenne ick Theodardus, kerckhere to Aurike, by myner waerheit deme alsse vorgescreven ys ghehandelt unde ghescheen unde nicht anders. Dessen to merer ghetuchnysse wytliker waerheyt hebben wy Thede grevynne upbenompt unse secreetsigill, unde ick Theodardas kerckhere vorben. myn rechte ingesegell doen drucken unde gedrucket up dessen breff. Gegheven up des hilligen Kersten avent, anno Domini LXX quinto.
