Die Häuptlinge und Deich- und Sielrichter von Groothusen, Eilsum und Larrelt privilegieren das Kloster Langen.
Universis et singulis presencia visuris seu audituris, Menardus vicedecanus in Hustum, Reduarclus et Udo capitales ibidem, Sibrandus in Ethilsum, [*] Alle in Astirhusum[*] capitales, Liuppoldus in Lherlete[*] ecclesie[*] curatus ac Haytatus ibidem, Ayldo rector ecclesie in Langhene ceterique capitales et iudices aqueductus in Lherlete[*] salutem et rei geste et iudicate noscere veritatem. Hinc est quod cum memoria hominum dinoscitur fore labilis et cor eorundem omni mobili mobilius, eapropter ne id, quod in tempore agitur, simul cum eius transcursu a memoria digrediatur, solet scriptis inseri et sic quodammodo perhennari. Quare considerantes indignum fore et inhonestum et iuribus legalibus ac canonicis inimicum, ut laici viris ecclesiasticis maxime regularibus, qui se et sua devote Deo obtulerunt, imponant tallias, collectas seu exactiones indebitas et iniustas, idcirco de communi omnium nostrorum concilio et assensu statuimus, ordinavimus ac perpetuis temporibus duraturum presentibus confirmamus, quod conventus in Langhene quandocunque et quocienscunque necessarium et expediens fuerit aliquam collectam, talliam vel exactionem fieri pro publica utilitate[*] vel privata, puta aggerum vel aqueductus seu alia quecunque, debeat et possit de sua propria et ultra suam propriam hereditatem vel hamrickam licet in aliena hamricka sitam collectiones et exactiones facere et congregare pro libito voluntatis et ad labores et expensas laborum publicorum solvere et contribuere iuxta ratam eius predia contingentem, nec eum ultra id aliquo onere debere pregravari, contradictione cuiusquam non obstante. Acta sunt hec et publice pronunciate in communi cetu laicorum in Husum, anno nativitatis Dominice MoCCCo LXXo, dominica proxima post octavas apostolorum Petri et Pauli.
