Der Pfarrer Yaye in Rhaude bezeugt die Hinterlassenschaft der Mewent Autens in Rhaude für die Kommende Muhde.
Ik here Yaye, kerchere to Rawede, [*] bekenne unde betughe in dessen openen breve vor allen guden luden, de den men ofte horet lezen, dat zelghe Mewent Auotens to Rawede, der God ghenedich se, in eren doetbedde unde eren leste unde in eren lesten ende to enen testament unde eren lesten wyllen vor deme hilghen sacramente vor my unde vor anderen guden buren unde tueghen hyrna screven gaf sunte Johannes unde deme convente to der Muode[*] unde deme vorwerke tho Halteren[*], suntc Johannes orde, al er erwe, dat ze alduslanghe ligghen in Haltere merke hadde unde hammeric, unde dat se ghebruket hadde wente in utganck eres lives wente in er dotbedde, na er dode to bruken also se dat bevoren ghebruket hadde; unde dat dede se umbe ener bedachtnysse erer zele unde al erer vrunde zele, de darto hopen weren unde bedachtnysse unde zelicheit van begherede. Des to tuoghe to ener warheit so hebbe ich her Yaye vorscr. myn ingesegel up dat spacium desses breves ghedrucket. Hiir weren an unde over Volqwiin unde Folric Gruobe unde ander lude ghenoch to tughe ghebeden. Screven int jar unsses Heren anno Domini MoCCCCoXXXIXo, ipso die Gregorii pape.
