Egbert Hannekens en zijn zoon Eyteke verklaren verkocht en bij stoklegging overgedragen te hebben aan Rotger van Huyswerden een stuk veen van tien roeden te Zuetlaren in de buurschap van Mydlaren.

Wij Egbert Hannekens ende Eyteke mijn echte soen bekennen ende tugen myt desen openen
breve voir ons ende onse erffgenamen dat wij vercofft hebben vastes stedes erffcopes erffgenamen
ewelic ende ummermeer Rotger van Huysweeden ende sijnen erffgenamen Eyn stucke veenlandes van
Tijn roden breet vijertien vote elke rode lanck up ende neder gaende myt thur? thuen weyde ende
myt den alingen gronde wanneer die torff aff gegraven is erfflic my te hebben ende myt alle
sijnen to behoren gelegen in kerspell van Zuetlaren ende inder buerscap van Mydlaren daer an de een?
zijd naest gelegen myns heren vene van van Utrecht ende an die ander zijde die Hovekinge erve
Om een somme gelts Die ons voll ende all wull betaelt is van Rutger voirscr. Ende wij
Egbert ende Eyteke voirscr. loven voir ons ende onse erffgenamen Rutger ende sijnen erffgenamen dyt vorsc.
vene also toe vrijen ende te waren ende rechte waerscap dair van te doen to lantrechte voir
ons ende voir onsen erffgenamen ende voir all die gene die daer myt rechte op spreken mogen
wtgesecht dat Rutger ende sijn erffgeamen die quetane? ons heren vanden [...] sall? so?
daer myt rechte op staen buten onsen schaden Ende des soe hebben wij Egbert ende Eytike
voirscr. Rutger voirscr. van desen vene myt sijnen to behoren ende voirwurden voirscr.
den stock gelecht voir den buren van Mydlaren als lantrecht is in Drenthe dair an ende
aver weren als bueren her Sicke Havekinge prester Johan Hoytinge Gerd Husinge
ende Johan Banynge in een tuech der wairheit want wij Egbert ende Eytike selven
geen segell en hebben soe hebben wij gebeden Herman bockens sculte inder tijt to Zutlaren
desen brieff voir ons to besegelen Ende ic herman Bockens omme beden willen Egbert ende
Eytekens sijn soens ende om gebreck ore segellen Soe hebbe ic mijn segell beneden
an desen brieff gehangen int jaer ons heren dusent vierhondert ende Eenendetsestich
des naesten vrijdages nae sancte Tyburtius dage.

x

x

Archief	Groninger Archieven
Fonds	Kloosterarch.
Toegangsnummer	172
Inventarisnr.	267
Regestnr.	430
Olim	Arch. Klooster Wijtwerd, inv.nr. 21, reg. 85. Reg. Feith 1461.24.
Jaar	1461
Datumcode	VpTiburt

x

x

Commentaar	Met het zegel van Herman Botkens, schout te Zuidlaren

x

Materiaal	perkament