Griete van Laer, abdis van het Sancta Annencloester, oorkondt dat zij aan Ghosen van Dulc, Heyneman van Dulc en diens vrouw Griete, alsmede aan hun ouders broederschap en zusterschap van haar convent verleent.

Wy suster Griete van Laer abdisse des cloesters ghehieten Sancta Annen cloester by Gronynghen
der oerden van cystercien dess ghestichtes van Munsteren hebben aenghesien die begheerten ende die devocien
der eerbaeren Lud[...] Ghosen van Dulc ende Heyneman ende Griete syn vrouwen welke die daer hebben
devocien ende my[...] onsen cloester ende dat mytten wercken hebben bewesen ende hebben begheert broeder-
scap ende susterscap [...]s cloesters voer selige Ghoesen van Dulc ende voer hem beiden ende voer hoer olders
waer omme wy synt aensiende hoer ynnicheit ende mynnen gheven hem broederscap ende susterscap ende maken
deelachtich vollencomen selighe Goesen ende hem beiden als Heyneman van Dulc ende Griete syn vrouwe ende
hoer beide olders den God ghenadich sy alle dier gheesteliken gueden ende waldaden die overmids der gracien
ons lieven heren in onsen cloester gheschien in missen, in sanghen des choers, in lesen, in bedinghen, in waken,
in vasten, in almissen, in disciplinen, in herberginghe der gasten ende in allen anderen waldaden die voertmeer
in onsen cloester voerscreven mytter hulpe Gods gheschien sullen. Soe dat sie iu in staden moghen staen in uwen
levende ende in uwer doet. Ende wanneer iuwer ene stervet ende dat ghekundighet wart in onsen capittel
soe sulle ghi daer van ons absolviert werden als een van den onsen ende deelachtich ghemaket werden
alle dier gueder werken die wy iaerlix ghewoenlic syn te doen voer broeders ende susters. Ghegheven
int iaer ons heren dusent CCCC ende LXXXII op des hillighen cruces dach invencionis. In oerkunde der
waerheit soe hebben wy (kr) suster Griete van Laer abdisse onse seghel an dessen brieff ghehanghen.

x

x

Archief	Groninger Archieven
Fonds	Kloosterarch.
Toegangsnummer	172
Inventarisnr.	62
Regestnr.	677
Olim	Losse kloosterstukken, inv.nr. 16, reg. 44. Reg. Feith 1482.35.
Jaar	1482
Datumcode	InvCru

x

x

Materiaal	perkament

x