Nycolaus, pastoor te Haren, en Johan Ludekens te Helpman doen als gekozen middelaars uitspraak in het geschil tussen het convent van Jesse en de buren van Haren over een uitwatering door de Esserwall.

Inder schellingen tusschen den convente van Jessen ende die bueren van Haren van den Esser wall daer die bueren van Haren voirscreven ene
wateringhe doer den selven wall voirscreven hebben sullen naeden stroem hebben wij Nycolaus cureet to Haren vander bueren weghen
van Haren Johan Ludekens to Helpman vanden convents wegen volmechtich alse gekoren dedinges luyden stede ende vast by ons gebleven sie mit vrent-
scappen verlycket ende een uutsprake gedaen in manieren hier nae bescreven. Int eerste sal dat convente voirscreven beholden den wall voirgenoemd
ende gebruycken tot oren schoonster buyten becroninge der bueren voirscreven ende die sloet byder suyder syd des wals streckende van
dat oest int westen sullen dat convent ende die bueren voirscreven gelyck bruycken ofte gelyck verhueren alse em des best believet. Ende
en konden sie niet gelycke verdragen soe mach een iegelick dat syne verhueren. Ende den sloot voirscreven sullen sie gelyck graven ende die eerde
up beyden handen werpen. Ende weert sake dat ene pert niet graven en wolde als dat behoeff waer soe sall die ander pert em ene wete
doen ende will die pert dan noch niet graven soe mach die ander pert dien sloot voirscreven alleen graven ende die eerde allene nemen ende
werpen up syne wall. Ende die wateringhe voirscreven sall ellick vysschen in synre mercke ende die bueren van Haren sullen wateren tot ewigen
daghen doer den Esser wall voirscreven ende die wateringhe voirscreven sall wijt wesen inden wall derteyn voeten. Des mach dat convent setten een
juck int middell ende die wateringhe voort int landt naeden stroom mogen die bueren soe wijt maken als em dat belevet ende desse
wateringhe sall her ghaen inden Olden sloot inde westersijd vanden Noorderboom ende sall inden stroom komen inde noordersijd van den Noor-
derboom. Ende dat convent voirscreven mach desse wateringhe inden wall voirscreven toemaken dat men mit ghenen scepen daer doer varen en sall
men dat het nochtans niet hinderlick en sij anden loop des waters sonder bekronynghe der bueren voirscreven. Hier is mede ingesproken
mit voorwerden dat die van Haren mogen desse wateringhe bruycken mit scepen als em dat van node is ore wateringhe toe roeden
ofte toe rumen. Des moghen die bueren voirscreven varen mit oren scepen doer den Sijllmaer ende voort door den sloet indes cloosters land
streckende naeden Suyderboom ende den sloet ruden ofte rumen als des noot is buyten becroninghe des convents voirscreven. Welke uutsprake
beyde perten stede ende vast angenomen hebben onverbroken to holden tot ewigen dagen soe als voirscreven is sonder alle argelyst. Des
tot ene oirkonde der werheijt want wij Nycolaus cureet ende Johan Luytkens voirgenoemd noch ter tijt selve gene segele en gebru-
ken hebben wy gebeden den ersamen Sweder Kater nu ter tijt scholt des gherychtes van Selwert dessen breeff voir ons toe be-
segelen. Ende ic Sweder amptman voirgenoemd om beden willen des eerbaren heeren Nycolaus cureet ende Johan Luytkens voirgenoemd mede
omme bede willen der perten voirscreven hebbe mijn segell mede an dessen breeff gehangen. Ende omme die meere vestenisse willen hebben
wij bueren van Haren voirgenoemd gebeden den ersamen Borgermestere ende Raedt der stad Gronyngen dessen breeff mede to besegelen.
Ende wy Borgermestere ende Raed voirgenoemd hebben omme bede willen der bueren voirgenoemd onsser stad secreet mede an dessen
breeff ghehangen. Gegeven inden jaer ons heeren dusent veerhondert veerendetachtentich des saterdages nae sunte Mergreten
dage virginis.

x

x

Archief	Groninger Archieven
Fonds	Kloosterarch.
Toegangsnummer	172
Inventarisnr.	159
Regestnr.	718
Olim	Arch. Klooster Essen, inv.nr. 17, reg. 95. Reg. Feith 1484.19.
Jaar	1484
Datumcode	SpMargar

x

x

Commentaar	Met het zegel van Sweder Kater, schout van het gericht van Selwerd; het secreetzegel van de stad Groningen is verloren

x

Materiaal	perkament

x