Burgemeesters en raad te Groningen verklaren dat Johan Reynkens en Lamme, weduwe van Johan van Ees, onder nader omschreven voorwaarden een huwelijk zijn aangegaan.

Wy borgemester ende raden Groningen [sic] betugen mijt dessen openen breve dattet echtscap ende hijlick tuschen Iohan Reijnkens ende
Lamme salighe Iohan van Ees wedewe is gherampt, gededinget ende besloten in munneren ende hilixvoerwerden hijr na
beschreven. Inden eersten so sal Iohans voerscreven gued weerdich wesen ende sal inbrenghen dre hundert arens ghulden in
reden ghelde ende in gueder waer bijnnen yaers ende een stal koen ende een gued bedde daer Peter Oltghers borghe vo-
er is gheworden, so he bekande. Des so is Peter Koeps borghe gheworden daer voer dat Lammens voerscreven sijnre doch-
ter gued sal weerdich wesen buten oer kinder gued soven hundert arens ghulden. Ende wes daer van komet van
dat arve dat Iohan saligher ghedachten ende Lamme voerscreven to samen hadden inden lande van Drenthe daer sal Lamme voerscreven
van hebben de helleffte ende de voermunder ende vogheden tot Lammens voerscreven kinderen behoeff de andre helffte. Ende voer
de tillebar guderen des den kinderen angestorven moghen wesen van oeren vader daer solen Iohan ende Lamme den kinderen
voer besorgen mijt kost ende clederen en allent wes hen noet is so langhe ende ter tijt to dat elk kijnt olt is vijfftijn iaer.
Ende weert sake dattet dochterken salighen Iohans voerscreven to cloester gebracht worde na den tijden dat se tijn
yar olt is so solen ende loven Johan ende Lamme voerscreven dat dochterken to gheven uut hoer twijer gued eens vijff
ende twintich arens ghulden to vullest hoer kost pennighen ende schoelghelt. Des solen Iohan ende Lamme verscreven
betalen ende ontfangen alle schulde en onschulde de se hebben, des solen oer beijder guederen de se heb-
ben an malkanderen brenghen ende myt vorstarff an komen moghen solen wesen halff ende halff ende
arven van onsen stat rechte, sunder argelist. Dat oerkonde wij mijt onser stat segel. Is gegeven inden
iaren ons heren dusent vijfhundert ende neghen des sondaghes na suncte Matheus dach, do These
Iarghes, Iohan Scaffer, Peter Sickinghe unde Luloff Conrades borgemester unser stat [sic].

x

x

Archief	Groninger Archieven
Fonds	Kloosterarch.
Toegangsnummer	172
Inventarisnr.	107
Regestnr.	950
Olim	Arch. Klooster Essen, inv.nr. 2, reg. 117. Reg. Feith 1509.20.
Jaar	1509
Datumcode	DpMatthe

x

x

Materiaal	perkament

x