Karel van Gelre bevestigt de uitspraak door Bernt van Hackfoirt, bevelhebber te Wedde, in de kwestie tussen het Grijzevrouwenklooster en de inwoners van Ostewolde en Midwolde, aangaande de incorporatie van de kerk van Ostwolde, waarbij kerk en goederen aan het klooster toegewezen worden.

Wij Kairll vander gnaiden
Gaidtz herttouche van Gelre etcetera
alsoe wij onlanxleden die kerck to
Ostenwolde in onse omlande van Groe-
ningen in onsen Alden ampte soe die
selve doch ruwinoes ind versiencke-
lick was nyet to kunnen bliven
staen doen affbrecken ind durch on-
sen lieven getrouwen Bernt van
Hackfoirt bevelre to Wedden op-
dat nijemantz durch affbroicke
der kercken off opleggen yemantz
anders van ons verkort en worde doen
handelen hebben mitten convent van
Grijsen vrouwen die van Ostewolde
ind die van Midwolde dioe alle drie
oere saicken deshalven aen hem ge-
schaeten ind verbleven hebben dairop
van hem eijn uytspraicke geschiet as
hijr nae volght as dat die vurscreven kercke
van Ostwolde mit allen oeren ingedoempte
ind renthen dairtoe gehoerende in
den cloister van Ghrijsen vrouwen leg-
gen ind dat nae doetlicken affganck
dess pastoers vicarien ind custers
die nu ter tijt sijn alle die renthen
landen ind pachten tot ter pastorien
vicarien ind custeren gehoerende in
den vurscreven convent ind cloester van
Grijsen vrouwen vallen ind komen mit
sullicker conditien ind vurwaerden dat
die priesteren ind jonfferen des conventes
vurscreven van stonden aen eijn ewijge me-
moirie maicken ind vur die ziele die
des loen eijgen then ewijgen daigen toe
in den cloister alle daige halden ind
bidden sullen. Ind off dieselbe bueren
van Ostwolde tot enigen tijt in den
vurscreven convent to kercken gaen wolden
sal denselven sulx altijt ongeweijgert
wesen. Dairbeneven is bededinght dat
die pastoir ind gemeijn kerckmeisteren
van Midwolde die gemeyn kerspel-
bueren die suslange to Ostwolde ter
kercken gehoert in oeren kerspell aenge-
noemen hebben dat zij then ewijgen
daigen mit die van Midwolde sullen
gelden ind genieten mitter kercken ind
perrochien van Midwolde. Ind want
dan mit verdragen is wij dit mit be-
lieven ind durch onsen brieve bestedigen
solden bekennen wij herttouch vurscreven
vur ons, onsen erven ind naekomelingen
dat wij allet wie vurscreven bestedicht ind
beliefft hebben bestedigen ind believen
mit desen onsen apenen brieve gelaeven
tselve in allen punten vurscreven vaststede
ind onverbroickelick to halden ind doen
halden allet sonder argelist. Des toirkonde
ind getuychnisse der wairheit hebben
wij onse zegell van ons rechter weeten-
heit hijraen doen ind heijten hangen.
Ind om vorder sekerheijt will dat dit
mit consent der parthijen alsus ge-
schiet is hebben wij van Ostwolde unsen
amptman in den Alden Ampte Roeloff
Huyging ind wij van Midwolde onsen
pastoir N. soe wij beijde perthen geen segell
en hadden gebeden dit mit vur ons
to willen besegelen dat wij Roeloff
Huyginge drost ind N pastoir to Mid-
wolde ther begeerten der gemeijne bueren
van Ostwolde ind Midtwolde gerne ge-
daen ind onse segelen beneven idt segell
onss genedigen lieven heren beneden aen desen
brieff gehangen hebben in den jaer ons
heren duijsent vijff hondert ind dartich
den X^en dach des maentz Junij.

x

x

Archief	Groninger Archieven
Fonds	Kloosterarch.
Toegangsnummer	172
Inventarisnr.	60
Regestnr.	1025*
Olim	Reg. Feith 1530.15.
Jaar	1530
Datumcode	1006

x

x

x

Materiaal	papier

x

Publicaties	Zie ook G.van Hasselt, Geldersch Maandwerk II p 543. Arnhem 1807.

x