Eduard, hertog van Gelre, waarborgt bij kinderloos overlijden van hem of zijn echtgenote de teruggave van de huwelijksgift, terwijl voor de nakoming onderscheidene personen, onder wie Reynoud, heer van Coevorden, zich bij leisting hebben verbonden.

Wy, Edwart van Gelre ende greve van Zutphen, doen kont allen luden . . . Ende hebben mit ons doen gelaven voer ons ende voer onse nacomelinge, alze borgen, onse getrouwe rade, riddere, knapen ende stede, alze . . . heren Reynoude, here van Covorden . . . riddere . . . Ende wy, rade, riddere, knapen ende stede, so hoe dat wy mit namen voerschreven staen, hebben gelaeft ende gezekert, gelaven ende zekeren by onser trouwen, eren ende zekerheit alze borghen ons lieven heren van Gelren ende sijnre nacomelinge te hauden ende te voldoen, weren onse lieve here van Gelre of sine nacomelinge in gebreke aller vorwarden oft in enen dele, also alze sy voergeschreven staen van onsen vorscreven here van Gelren ende sinen nacomelingen . . . Ende were oec dat zake, dat wys niet en deden, so souden wy, Edwart, hertoge van Gelre voerscreven, of onse nacomelingen inkomen leysten oft voer ons senden te leysten in ene der stede van Hollant, die ons hertoge Aelbrecht van Beyeren of jonvrouwe Kathrine vorscreven wisen zouden of doen wysen, mit twintich perden ende mit elken perde voer oft nae in desen brieve geschreven enen eersamen man, ende wy, riddere voerscreven, elc van ons met dryn perden . . . ende mit elken perde enen man, alse voerschreven is, dagelics te leisten, rechte maeltide te hauden, ons selve te quiten ende niet van der stat te scheiden, wy en hebben eer jonvrouwe Kathrine, of sy asdan leeft, of hertoge Aelbrect, of sy niet en leefde, of sinen nacomelingen vol ende al betaelt van hoeftgelde ende van dachgelde vorscreven ende den wert van sijnre koste . . . Vort were dat zake, dat enich van ons borghen voerscreven ghene vorwarden en hilde, daermede en zoude die ander niet ontschultdighet wesen. Were oec dat zake, dat enich der burghen of leysters aflivich worde in der tijt der leistingen oft eer, in des stat, der were een of mere, sal men enen as gueden man binnen veirtenachten wederom setten, naedat hem des vermaent worde. Vortmere were dat zake, dat enich van ons borghen vorscreven of van den steden sich verboisde of as quaet worde, dat God verhuede, so dat hi niet en hilde noch en voldede, dat hi gelaeft of gezekert hedde in gueden trouwen in desen brieve, so verwilcoren wy, dat opten ghenen, daer dat gebrec ane were, dat men sijn lijf, sijn guet, liggende of ruerende halden of antasten mach mit gerichte of sender gerichte, in wes heren lande, hi were geystelike of werentlike, dat vonden worde of in wat stede ende vryeheide, sonder alle wederseggen sijns oft ymants anders, ende darmede vorscreven hertoge Aelbrect of jonvrouwe Kathrine of hare gewisse bade haren vryen wille mede doen moegen, gelijc sy doen moechten mit haers selfs eygene gude. Ende vertien darop as nu ende hiernamaelts tot ewigen dagen voer ons selve, voer onse erven ende nacomelinge, ende dartoe en solen wy noch onse mage noch onse vrinde nummermeer wrake, verbal noch vede om doen noch houden in gheenre tijt. Alle dese vorscreven punten, gelijc die van elker onser voer of nae in desen brieve geschreven staen, hebben wy gezekert ende gelaeft by onser trouwen ende zekerheit ende in rechten eydstat vaste, stede ende onverbreclic te houden sonder alle argeliste. In orkonde des ende tot gantser stedicheyt aller dinge voerscreven so hebben wy, Edwart, hertoge van Gelren vorscreven . . . Reynout, here van Covorden . . . riddere . . . onse zegele mit onser wetenheit ende wille an desen brief doen hangen ende selve gehangen in getuge der warheit. Vortmere is gevorwart, were dat zake dat enich zegel, der were een oft mere, an desen brief gebreke of niet gehangen en worden of oec transfixbrieve hierdoer gesteken worden, darom en sal hi ghene de minre macht hebben, mer hi sal in sijnre gantser macht bliven ende wesen, gelijc dat hi vol zegels were ende geen gebrec en hedde ende gelijc daer gheen transfixbrief doer gesteken en were, alle argeliste ende nye vonde gensliken in desen brieve uytgenomen. Gegeven int jaer ons Heren dusent dryhondert acht ende tseistich op Allerheilgendach tot vespertyde.

x

x

Fonds	Oorkondenboek Groningen en Drenthe
Nr	561
Olim	Naar Nijhoff, Gedenkwaardigheden van Gelderland, II, no. 162, blz. 235.
Jaar	1368
Datumcode	OmnSan

x

x

Commentaar	Aan het stuk hangt o. a. hetzelfde zegel van Reynoud van Coevorden als aan no. 560.

x

Materiaal	papier

x

Edities	P.J. Blok e.a., Oorkondenboek van Groningen en Drente, I (Groningen 1896), nr. 561.