Frederik, bisschop van Utrecht, belooft Sweder van Hekeren, geheten van Rechteren, schadeloos te houden ter zake van een borgstelling voor de stad Zwolle in de oorlog over Coevorden.

Frederic, bi der genaden Goeds bisscop tUtrecht, maken kond allen luden, dat wij voer ons ende onse nacomelincge, bisscope tUtrecht, hebben
geloeft
ende loeven vastlic mit desen brieve al quijt te maken ende scadeloes te holden . . Sweder van Heker geheten van Rechter ende alle sine
erfgenamen van vijffhondert
goeden olden volwichtigen Vrancrixschen scilden of gelijc payment daervoer, die onse stad van Swolle in onss gestichts orbar ende noetsaken ons
an provianden in onsen oerloge van Covoerde verleecht ende uytgedaen heeft, daer die selve Sweder om onser bede wille ende van onser wegen voer
heeft geloeft an hande der borgermeysteren, scepenen ende rade onser stad van Swolle voerscreven in enen openen brieve sprekende te betalen op
sente Martijnsmisse in den wijnter naestkomende nae date des briefs. Ende voert van allen cost, den hi of sine erfgenamen daerop doet, ende van
allen scade den sy daer bi lijdt, te goeder bewisinge sonder argelist. In orconde des briefs besegelt mit onsen segel. Gegeven te Deventer int
jaer onss Heren duysent driehondert sess ende tnegentich op onser Vrouwen avond Annunciatio.

x

x

Fonds	Oorkondenboek Groningen en Drenthe
Nr	923
Olim	Naar het origineel op het huis Rechteren bij Dalfsen, hoog 10,2, breed 27,3 cm.
Jaar	1396
Datumcode	vAnnMar

x

x

Commentaar	Het zegel is afgevallen.

x

Materiaal	papier

x

Edities	P.J. Blok e.a., Oorkondenboek van Groningen en Drente, II (Groningen 1899), nr. 923.