De bestuurders van de stad Zutphen verlenen vrijgeleide aan allen, die het aan Reynold van Coevorden beloofde geld in hun stad zullen komen betalen, en verklaart tevens de desbetreffende brief van de drie steden Deventer, Kampen en Zwolle in bewaring te hebben genomen en die na de betaling te zullen teruggeven.

Wi, burgermester, scepen ende raet der stad van Zutphen, bekenne mit desen apenen brieve, wert dat Reynald van Covorde vertichnisse dede van Coverde ende van Drenthe mit hoeren tobehoern, also alz die hogeboerne vurste onse lieve ghenedige here, die hertoge van Gelre ende van Gulick ende greve van Zutphen tusscen dien erwerdigen in Gode vader ende here heren, Frederic, bisscop tUtrecht, ende sinen gestichte an die ene zijde ende Reynald voirs. ende sinen vrienden an die ander zijde in eenre zwone van der vede, rurende van Covorde ende van Drente, voirs. uytgesecht heft, ende die ersaem bescheydene lude burger-mestere, scepen ende raet der drier stede van Zalland alse Deventer, Campen ende Zwolle betalen wolden Reynalde van Covorde voirs. ende sinen rechten erfgenamen gebreke sijns alzulc gelt, alz zij dien voirs. Reynalde geloeft hebben in onser stad te betalen na inholt der brieve, die zij mit oere drier stede segele besegelt hebben, zo hebben wij geloeft ende loven mit desen selven brieve dien voirs. burgermestere, scepen ende raet der drier stede voirs. Deventer, Campen ende Zwolle ende alle denghene, die zij dan mit hem nemen off die dan tot Zutphen comen omme dat gelt te betalen, alsdat wij zi bynnen onser stad van Zutphen veligen mit hoerren live ende goede voir ons ende voir alle onse burgere ende vor alle dieghene, die om onsen wille doen ende laeten willen, zunder argelist. Ende want die brief van den voirs. gelde sprekende van XVM olden schilden, ons ghelevert ende bi ons geleget is als in ene ghewairde hand tusscen Reynald ende dien drien steden voirscreven, so hebbe wij geloift ende loven vastelijc mit desen brieve, werd dat Reynald voirs. des overqueme, dat hij die vertichnisse van Covorde ende van Drenthe niet doen en wolde, zodat hij dairmede niet en volvure noch die vertichnisse niet en voltoge bynnen dien termijne der betalinge van den XVM olden schilden voirs., die wesen sal in den jaer onss Heren MCCC ende twe des XIIII dages in Meye, alsdat wij dan die burgermestere, scepen ende raet der drier stede voirs. off horen wissen boden tot hoere behoef dien voirs. brief van den XVM olden schilden zullen deleveriren ende wedergheven sonder vertreck, als ons des vermaend ende gesonnen werd, sonder enigerhande argelist. In orkonde etc. XCV1I opten lesten dach in Meye.

x

x

Fonds	Oorkondenboek Groningen en Drenthe
Nr	959
Olim	Naar een afschrift uit de 15de eeuw in het Diversorium fol. 194vo, in het gemeentearchief te Kampen (Reg. I, no. 323).
Jaar	1397
Datumcode	3105

x

x

Materiaal	papier

x

Edities	P.J. Blok e.a., Oorkondenboek van Groningen en Drente, II (Groningen 1899), nr. 959.