| Nummer:oub0161 | Datum:24. Okt. 1392 | Overlevering:Editie | Vindplaats:Ostfriesisches Urkundenbuch, I, S. 137, nr. 161 |
Herzog Albrecht von Baiern, Graf von Holland, erucht Widzel, den Sohn Ocko’s, Verwahrer Brokmerlands und Aurichs, dem Rotterdamer Bürger Tyman Potter, welcher von Aybo Rambodisna aus Harlingerland gefangen war, und nun die Erlaubniss zur Beschädigung der Harlingerländer erhalten hatte, bezustehen.
Item op ten XXIVste dach in Octobri anno XCII. oirlofde myn heer, consenteerden ende maecte machtich bi syn open brief, ghegheven in den Hage op ten date voirscr., Tyman Potter poerter te Rotterdamme, die ghevanghen was in Herlingherland van enen man, gheheten Aybe Rambodissma, dat hi sinen scade, ende oic synre ghesellen, verhalen mochte, ende dat hi ende oic syn vriende ende hulpers, die hem om synre bede wille dair toe helpen wouden, slaen ende vanghen mochte den voirscr. Aybe, ende anders alle die ghene, die in Herlingherland geseten of wonachtich waren, sonder yet jegens minen heer dair aen te misdoen, also verre als si in den vrede niet en waren, die myn heer mitten Oestvriesen heeft, of dat ei geen gheleide van minen heer en hadden; ende myn heer beval voirt in den selven brief alle bailiuwen, steden, scouten, ende anderen rechteren over al in Holland ende in Zeeland, ende sunderlinge oic Baet Wydzele, heeren Ocken zoon, verware Brocmerlandes ende Aurikens, dat si den voirscr. Tyman Potter om myns heeren wille gunstich, hulpelic ende vorderlic wesen wilden, ende him onthout doen wilden, waert dat hi of syn vrinden of medehulpers den voirscr. Aybe, of yemand ut Herlingerlant voirscr. venghen, of hoer goede namen te water of te landen, om der voirscr. saken, ende dat si daer mede in horen bedrieve, of in den sinen quamen, dat si die scatten mochten, ende hoer goede, die si namen, gebruken tot hoer besten oirbaer, om horen scade te verhalen.
