| Nummer:oub0228 | Datum:Hamburg, 13. Jan. 1412 | Overlevering:Editie | Vindplaats:Ostfriesisches Urkundenbuch, I, S. 190, nr. 228 |
Der Bremer Bürger Eler Zeelhove quittirt dem, Rathe zu Hamburg über eine grössere Geldsumme, welche dort für Keno tom Brok aufgenommen war.
Ik Eler Zeelhove, borger to Bremen, bekenne openbare in dessem breve vor allesweme, dat ik tor noghe an guden reden jelden[*] penninghen entfanghen hebbe von den ersamen unde vorsichtigen wysen heren borgermesteren und radmannen to Hamborch 240 und 61/2 mark Lubesch van Gherd Buzeken, Hinrikes Vryen, Luder Groven und Eler Kyndes wegen, borgers to Bremen; welke 240 und 6 1/2[*] mark penninghe by den ergenanten borgermesteren und radmannen stunden to des duchtigen mannes hant, Kenes hovetlinghes to dem Broke, und late de heren borgermestere und radmannen und ere nakomelinghe vor my und mynen erven van der erbenomeden summen wegen qwit, leddich und loes, myd craft desses breves. To merer tuchnisse hebbe ik myn ingesegel witliken und myd gudem willen vor dessen breff gehenghet. Gheven to Hamborch, Godes bord dusent veerhundert, darna in dem XII jare, des mydwekens na der hilgen drier konigh daghe.
