| Nummer:oub0238 | Datum:25. Aug. 1413 | Overlevering:Editie | Vindplaats:Ostfriesisches Urkundenbuch, I, S. 196, nr. 238 |
Schiedsspruch, des Rathes von Groningen in der Irrung zwischen Keno tom Brok, Hisko von Emden und Enno von Larrelt über die den Eberhard Idzinga'schen Unterthanen auf der Ems weggenommenen Güter.
Dyt ys dat zegghent, dat wi borgermestere unde radmanne der stad van Groningen zegghent vor recht van gebreken, de gheschen sin bynnen vrede tuosschen Kenen, hovedingh to Broke, unde sinen underzaten an de ene zijt, unde Hisseken provest unde hovedingh to Emeden, Ennen hovedingh to Lerlte unde eren underzaten an de anderen zyde, alze van deme gude, dat up de Emese genomen ys Everde Ydsinghe undersaten bynnen vredes, welker schelinghe se an beyden siden vorscreven uns tobelovet hebben na inholt erer cedelen, de ze uns darop gegeven hebben. Hirop zo zegghe wi vor recht, went de ghene, de dyd vorscreven gud genomen hebben, wonaftich weret to Emeden unde to Lerlte, unde van dar uthgevaren sint, do ze den schaden deden, dat Hisseke unde Enne vorscreven den schaden betalen solen alzo grot, alze de ghene eren schaden maken willen mit eren eden, den dat gud genomen ys, me(n) ze en zuollen eren schaden nicht groter maken, dan ze in scriften over gegeven hebben. In orkunde zo hebbe wi unser stadsecret hir op id spacium desser cedulen gedrukket. In den jaren unses Heren dusent verteynhundert unde drutteyne, des vrygdages na sunte Bartolomeus dage.
