| Nummer:oub0240 | Datum:8. Dez. 1413 | Overlevering:Editie | Vindplaats:Ostfriesisches Urkundenbuch, I, S. 197, nr. 240 |
Der Rath von Groningen zeigt dem Rathe von Lübeck die Einnahme Emden's und Termünten's durch Keno tom Brok an, benachrichtigt ihn von den gegen Keno getroffenen Massregeln und bittet die Hansestädte um Hülfe zur Wiedereroberung Emden's.
Ersame lieve vrende borghermeister ende raet der stad to Lubeck. Wy borghermester ende raet in Groningen doen ju vrentlike groten mit begheringhe alles godes, ende doen ju to weten, wo dat Kene van den Broke hevet Hysseken van Emeden zijn slot ende stedekyn afghewonnen boven enen gueden vreden, den sie mallickander ghelovet, beseghelt ende bibrevet hebben, ende up de breve ghelovet ende ghezworen hebben, den vrede stede, vast ende onvorbroken to holden sunder enigherhande arch off list. Ende ter stand binnen dreen daghen daerna, do he Emeden ghewonnen hadde, do sende he heren Almer mit anders zinen vrenden ende ondersaten over to der Munten, [*] ende was one off[*] onse opene slot to der Munten unontseghet ende onvorwaret boven enen vrede, daer wy mit hem an stunden tot vier ende twintich jaren. Ende waerschuwen ju ende alle gode lude, dat sie sick huden voer dezen eerlosen, troulozen, meynedighen man; ende waret sake dat he hijr eet enteghen seggen wolde, wy willens mit hem to rechte gaen voer heren, vorsten, rydderen, knapen ende sieden, die sich rechtes vorstaen, ende willent hem overgaen mit zines sulves beseghelden breven, off wo wy hem dat mit rechte overgaen sullen. Voert, leven vrende, want hem neet to gheloven en staet, so hebben wy de pale by der Emese langhes beset ende hebben onse vrende daer leggen, om onse pale ende onser vrende lande to bewaren, ende ock mede daerto te sene, dat men Kenen negheen goet to en vore. So begehren wy van ju, dat gy juwen coepluden kundich doen, dat sie negheen goet en voren in Kenen ghebede; want, wor det hem ghenomen van onsen vrenden, daer en wolde wy neghene claghe van horen. Voert, lesen Vrende, als ju wol to verdenken is, wo Wydsolt tovoren ende Kene na de Vitalienbroders to ontholden pleghen, die den coepman micheliken groten schaden hebben, ende gij ock wol vornemen, dat in Kenen neen ghelove en steket, ende to vormoden is, beholt he Emeden, dat he in tocomenden tijden den coepman vele schade doen sal, so begehren wy van ju, dat gy wilt spreken mit den raet van den steden, die naest by ju gheleghen sin, oft hem ende ju goet duchte, dat wy tosamen vellen ende daerna weren, dat wy hem mit samender hant Emeden weder off wannen, up dat men in tocomenden tijden negheen sorghe en dorfte hebben, dat die coepman van Kenen nicht beschedighet en worde. Ende, leven vrende, wes juwes willen hiir aff is, begheren wy juwe goetlike antworde weder bescreven bi dessen boden, brengher desses breves. God sij mit ju. Ghescreven onder onser stad secret, in den jaer ons Heren dusent vierhondert ende dertiene, up onser Vrouwen dach conceptionis.
