| Nummer:oub0261 | Datum:7. Okt. 1418 | Overlevering:Editie | Vindplaats:Ostfriesisches Urkundenbuch, I, S. 219, nr. 261 |
Vertrag zwischen den Acht Kirchspielen, Ocko tom Brok, Groningen und den Umlanden.
Wy praelaten, greetmans, hovedingen, rechters ende mene meente van Achte Kerspel doen kundich allen luden mit desen openen breve, dat wy hebben anghenomen ende ghededinget mit den eerbaren luden als jonker Ocko van den Broke ende mit allen den ghenen, de onder hem gheseten sin ende mit den praelaten, hovedingen, rechteren ende mene meente van Hunsegelande, Fivelgelande, Hummerse, Langwolt, Fredewolt ende mit den eerbaren luden borgermesteren, rade ende mene meente in Groningen enen steden vasten vrede tuschen hiir ende Metydage naest komende na datum deses breves, ende dat op ene stede vaste soene to holdene, op alsodane compromisse, articule ende vorwarde als hiir nabescreven staen, ende hebben onse soenlude daerop ghecoren mit gueden voerbedachte berade eendrachtelike als de eersame lude her Fice kercheer to Zuderhusen, heren Tiaert persone to Upptwisel, Thiaert Herema ende Bolle Gaykema, ons mit den eerbaren luden als Reynolt Hughing, Eyleke Onste, Barolt Ebbinge ende Hinric ter Bruggen, de eendrachtelike gecoren sin van jonker Ocken ende dese vorscr. lande ende stad van Groningen oer soenlude to wesen ende mit den eersamen vader in Gode heren Mennen, abt tot Adewert, den dese vorscr. soenlude by onsen rade ende jonker Ocken desen vorscr. lande ende der stad van Groningen gecoren hebben tot enen overman to scheidene van aller schelinge ende ansprake, de wy van Achte Kerspel mit jonker Ocken, sinen hulperen ende onderzaten ende mit desen vorscr. landen ende mit der stad van Groningen ye voer desen dage van datum des breves mit malk anderen ghehat hebben. Ende dese vorscr. soenlude mit desen vorscr. overman zullen komen bynnen Groningen des soenendage na elven dusent Mageden nu naest comende; up welken dage wy sullen komen bynnen Groningen ende horen dat seggen uetseggen van der scelinghe vorscr. van den soenluden ende overman vorscr. ende den dach vorscr. to waren ende dat seggen to holden elk by eenre penen van twen dusent olden schilden. Ende weert dat dese vorscr. soenlude mit desen vorscr. overman niet eens en kunden dan op dese vorscr. tyt worden, mit welke soenluden dese vorscr. overman dan to vallet ende dan uetseghet, dat seggen sulle wy dan holden elk by der vorscr. penen van twen dusent olden scilden, dat en weer dat dese vorscr. vader als een overman den dach verlengede, ende wes dagen he ons dan verlengede, de sulle wy holden ende waren mit onsen soenluden ende holden dat seggen dat he seget in desen vorscr. saeke by der selver vorscr. pene. Ende weert dat de overman off de soenlude storven eer deser tijd of daer nicht by komen en kunde, so mach men ander soenlude ende overman in de stede setten. Ende weert, dat wy van Achte Kerspel of enich van onsen kerspelen in onsen lande dese vorscr. soene ende dat seggen in breken tot enigen tiden ende ons die overman dat oversegede, dat God verbeden moete, so welk kerspel dat dede broket dusent olde scilden, ende de ander kerspelen de daer gheen scult an en hebben sullen den broke mede helpen uet wynnen ende de broke sal wesen half der stad van Groningen ende half der gheenne de ene mede uutwynnen, dat en were, dat daer vier of ses of meer lichte lude weren, de den vrede offte sone inbreken, de zal men antasten ende overleveren voer de pene, dat en weer dat de handadige mit sinen hulperen ontlepe, so sal men sie ewelike vredeloes leggen, ende weert, dat se weder int lant quemen, so sal dat lant behacht wesen voer de pene, of se sullen de vredeloze ter stunt overleveren. Item so en sal Ocken vorscr. sinen ondersaeten ende helperen mit desen vorscr. landen noch der stad van Groningen mit oeren hulperen gheen scade scheen in onsen lande, uet onsen lande noch doer onsen lande, by namen van den ballingen van Groningen ende deser vorscr. lande noch van oeren hulperen noch van anders nemande de oer viande sin. Item zo en zullen wy ghene ballingen noch oere hulperen ontholden noch herbergen in onsen lande daer wy dat weten, dc verdreven sin uet desen vorscr. landen ende stad by der vorscr. pene. Item alle lude uet desen vorscr. landen ende stad zullen velich wesen in onsen lande to water ende to lande by dage ende by nachte, ende desghelikes sulle wy velich wesen in desen vorscr. landen ende stad. Item so en sullen wy de van Groningen ghene sloete opslaen laten in onsen lande to beschedigen de lande omtrynt ons liggende, meer alle guede rustelike zaken mit malk anderen voert to setten. Item so mogen de van Groningen ende oere hulperen oere viande beschedigen in onsen lande, doer onse lant, voer by onsen lande, ende daer en zulle wy em nicht hinderlic inne wesen by der vorscr. pene. Ende dese vorsr. punten ende de de soenlude mit den overman noch begripen in der soene of in der vrede lote wy prelaten, greetmans, hovedingen, rechteren ende mene meente vorscr. stede ende vast to holden by unser ere ende truwe also guede lude. Ende wy Haie Harema van Zuderhusum, Focke Haiena, Benne Ypema, Haie Moyema, Ghirbit Hedekena, Wigger Hiddema, Bun Buema ende sancte Angus (?) buren, Wigger Thaddema, Herke Mensema, Alle Ensema, Albe Hiresma, Hayteke Folkersma, Wyben Haynga, Lange Wigger in der Hem, Yelte Hidema, Ant Mirrima van Uptwisel, Myrek Ymema, Fuga Altekena, Mecke Rummema, Wygger Ankema, Wygger Yema, Herdric Entekema, Romme Luwinge to Uetpost, Harke Yltisma, Popke Baldinge, Rummert Eltinge, Wyger Herena hebben mit op gherichten vingheren liiflike in den hiligen gesworen dese vorscr. punten stede ende vast ende onverbroken to holden ende hebben mede ghelovet ende loven by den selven eede vorscr. dat alle de ghene, de in Achte Kerspel nu ter tyd wonachtic sin, de tot oeren jaren gekomen sin, zweren eer deser. vorscr. tyd in den hiligen dese vorscr. punten stede ende vast to holdene tot ewigen dagen, dat en were, dat de Romesche koning selver int laut queme of een groet mechtich landesheer van synre wegen, ende vermaenden ons dan onss eedes, den wy heer Nyclaes ghedaen solden hebben, so sal ons dese vorscr. eed onbehindert wesen. Meer heer Nyclaes dedingen ende synre gheselscaps, de mit hem in Vreeslant hebben ghewesen en zulle wy nicht meer ons onderwynden. In een orkunde besegelt mit onss landes segel in den jaer ons Heren MoCCCCoXVIIIo, des vryedage na sancte Remigius.
