| Nummer:oub0265 | Datum:28. Juni 1419 | Overlevering:Editie | Vindplaats:Ostfriesisches Urkundenbuch, I, S. 224, nr. 265 |
Friedensbündniss zwischen Ocko tom Brok und dem Bischof von Utrecht Friedrich von Blankenheim.
Ic Ocke von den Broecke, tot Awerck ende tot Emeden, in Oestvrieslandt hoeftlinge make kont allen luden, dat ick voer mij ende mijn naecomelingen ende erffgenamen by rade ende guetduncken mijnre vriende, om nutticheijt ende orbaer mijnre lande, lude ende ondersaten, mitten eerwerdigen in Godt Vader ende heer, heeren Frederick van Blanckenhem bij der genaden Goodts bisscop tot Utrecht, mijnen genedigen lieven heere om mit hem ende mit sijnen nacomelingen bisscopen to Utrecht, ende mit sijnen landen, luden, steden ende ondersaten ende sunderlinge mit sijnen lande van Drenthe ende synre stadt van Groeningen daerin gelegen in meerre vrientschappen ende vreeden te staen ende te blijven een vriendelike dedinge ende overdracht gemaket ende gesloten hebbe in allen voerwerden ende manieren als hier naebescreven staet. In den eersten soe en sal ic noch mijn erffgenamen ende nacomelingen den voorscr. mijnen genedigen heer noch sijn nacomelingen bisscopen to Utrecht in zijnen heerlicheiden, landen ende luden, soe als he die huden op desen dach van Goidts genaden heeft ende besitt ende sunderlinge in der vrientschap ende huldinge, die he mit sijnre stadt van Groeningen, die hem nu als se doch van recht schuldich waren gehuldet ende hem tot hoeren rechten lantshere ontfangen heeft ende in der vrientschap ende overdracht die he mitten Ommelanden als Hunsinge ende Fivelgelande, Hummerse, Langewolt ende Fredewolt gemaket heeft, niet hijnderlick wesen. Item soe zal ic ende mijn nacomelingen ende erffgenamen dat alsoe besorgen nae onsen vermogen dat mijnen genedigen heer van Utrecht ende sijnen nacomelingen bisscopen to Utrecht ende zijnen landen, luden, steden ende ondersaten gheen schaede en gechie in mijnen lande noch doer mijnen lande. Ende weert, dat ijement mijnen heer off sijnen nacomelingen of ondersaten voerscr. schaede dede in mijnen lande off doer mijnen landen, dat sullen ic ende mijn nacomelingen ende erffgenamen keren ende berichten nae onsen vermogen off dat onsen ondersaten geschieden ende angenomen weer.Ende weert dat eenich gebreck aen eenijger zijden geschiede, dat Godt verbieden moet, dat salmen doen berichten nae rechten zeden ende gewoenten der lande daer dat geschiede, alsmen dat in voertijden voer datum des brieffs plach te berichten, dese punten nochtant in hoere volre macht te blijven. Welcke punten voerscr. ende elck bijsonder ic Ocke van den Broeck voerscr. voir mij ende voer mijn nacomeligen ende erffgenaemen gelove vast ende stede te holden sonder argelist. Ende des tot eenen orkond ende eenre ewiger stedicheijt, zoe heb ick voer mij ende voer mijn nacomelingen ende erffgenamen mijn segel aen desen brieff doen hangen. Gegeven int jaer ons Heeren dusent vierhondert ende negentien, op sant Peters ende sant Paulus avent der heijliger apostelen.
