| Nummer:oub0290 | Datum:Den Haag, 19. April 1421 | Overlevering:Editie | Vindplaats:Ostfriesisches Urkundenbuch, I, S. 251, nr. 290 |
Herzog Johann von Baiern beklagt sich in einem Schreiben an Florenz von Alkmade, den Statthalter von Vriesland, über Ocko tom Brok.
Hertoge Johen van Beyeren, enz. Lieve, ende getruwe, uwen brief, an ons gesandt, hebben wy wail verstanden, ende oic den brief, die u Ocko van den Broke gesandt heeft, inhaldende, dat hy syn vriende voir Sloten gesaint hadde, ende die Schieringe mit den hoeren dair in doen beliggen, ende hem beclagende in, dat syn vriende van den onsen onverwairt overvallen souden wesen, mit meer woerden, in den selven synen brieve begrepen. Dair op wy u weder scryven, ende laten weten, dat ons vele mere noot weer ons van Ocko voirscr. to beclagen, dan hy mit reden, of bescheyde op ons mach doen, want die Schieringe van Oistergo ende Westergo mit den hoeren bekenden, dat wy hoir rechte geboren erfheer waere, ende dair om van Goids wegen, ende van rechts wegen tot onser onderdanicheit quamen, ende namen ons tot hoeren rechten geboeren erffheer, ende leverden ons over in onser gewalt alle die steden ende slote, die sy mechtich waeren, ende swoeren ende geloefden onsen vrienden, tot onser behoef houde ende trouwe te wesen, ende te doen dat goede lude ende onderseten hoeren rechten heere schuldich weren te doen, 't welke in allen desen landen, hier omtrent gelegen, wail kenlic ende openbair was. Des wy dair op onse vriende ende steden schicten binnen Sloeten om die te verwaeren, ende dair toe te sien. Daeren boven vele duechten, ende gunsten, die wy, ende onse ouderen Ocko ende synen ouderen ende vrienden, Vetcopers partye, vele meer gedaen ende bewyst hebben dan de Schieringen voirscr. tot vele tyden, als wy wael bewysen, ende toebrengen souden. So heeft Ocko voirscr. syn vriende onverwaert tegens ons geschict voir onse stede tot Sloeten, om die te becreftigen ende te overvallen, ende hadden onse vyande, als die steden van Overyssel mit den hoeren dair mede toegebracht, dat sy mit groten hopen van luden in die Kuenre waeren gecomen, om mede voir Sloete te comen, ende die mede helpen te becreftigen, alsmen wail bewysen sall. Des onse vriende, steden, ende onderseten voirscr. mit der hulpe van Gode, ende van hoeren vrienden hem ontsetten, ende Ocko luden ende vrienden voirscr. sloigen ende vingen, so hem dat denkenliken noot dede, ende van noods wegen schuldich waeren te doen. Voirt scryft Ocko voirscr. in synen voirscr. brief, dat ghy an ons verwaeren woudt, hoe hy, ende die lande van Oistfrieslant eyntlic mit ons bliven souden ter goeder bewaringe an beyden syden, enz. Dair op wy u oic weder scryven ende weten laten, wairt dat Ocko voirscr. also bedacht weere, dat hy ons berechten walde, dat hy ons vercort, ende misdaen heeft by onsen vrienden, ende der synen, dat billic ende redelic waere, ende ons voirt dede, dat syn ouderen des onsen gedaen hebben, ende weder van dien te leen ontfangen, ende dat Ocko voirscreven geerden by ons te comen, of syn vriende te schicken, wy wouden hem, of synen vrienden wael goet geleyde geven om te besien, ende te ondervynden, dez dair af syn soude, ende dat hy, ende die lande van Oistvrieslant mit ons, ende onsen landen te gunsten comen ende blyven mochten. God sy, enz. Gescreven in den Hage, XIX. dage in Aprille.
