| Nummer:oub0308 | Datum:30. Mai 1422 | Overlevering:Editie | Vindplaats:Ostfriesisches Urkundenbuch, I, S. 274, nr. 308 |
Wibrand Hermana und Sicko Siarda versprechen den Sendeboten der Hansestädte von nun an keine Vitalienbrüder oder andere Räuber in ihrem Gebiete zu dulden, sondern dieselben als Uebelthäter zu verfolgen.
Wytlyk unde openbair sy allen luden, de dessen breff zeen edder horen lesen, dat wy Wybrand Hermana[*] unde Sycca Syarda hebben gheloved unde loven in guden truwen vor uns unde vor unse erven, boren unde ungeboren, den erbaren sendeboden, alse her Tydemann Steene unde her Lodewich Crul van Lubeke, her Hinrich Papendorp unde her Merten Swartekop van Hamborch to behoff erer twyer stede vorscreven, dar se to desser tiid vore in desser reyse synt, unde vord de ghemenen hansesteden, dat wy unde unse erven oft nement van unser weghene na desseme daghe na ghifte desses breves scollen[*] noch en willen nene Vytallienbroders noch andere rovere vorentholden noch vordeghedynghen, in unsen sloten husen edder heghen in unseme ghebede eft wor wy des mechtig synt, de den menen copman unde de hansestede beschedeghen, men se to vorvolghende unde vordryven, wor wy konen unde moghen, also men sodanne misdeders schuldich unde plichtich ys to donde, unde ute deme lande to drivende mit al unser macht sunder arghelist, opsate edder nige vonde. To orkunde unde merer sekercheit so hebbe wy Wybrands unde Sycka vorscreven vor uns unde unse erven unse rechten ynghezeghele henghen laten nedden an dessen breff. Unde to ener groteren betuchnisse hebbe wy beden her Nitert, personer to Franeker, dessen breff mit uns to beseghelende, des he syn seghel mit uns an dessen breff heft ghehanghen. Over desse deghedynghe weren over unde an Focko Ukana hoftlyngh to Lere[*], Wybet van Stedestorpe, Hinrik to Brugghen, Dethmer Reyners unde Hinrik Beyer. De ghegheven ys int jar unses Hern dusent veerhundert yn dem twe unde twyntighesten jare, up den hildghen Pynxstavend.[*]
