| Nummer:oub0331 | Datum:23. April 1425 | Overlevering:Editie | Vindplaats:Ostfriesisches Urkundenbuch, I, S. 294, nr. 331 |
Die Brüder Heddo, Tanno, Hero und Yno Kankena und Mauritz Kankena schliessen seit Ocko tom Brok einen Freundschaftsvertrag ab.
Wij Hedde, Tanne, Here unde Yne brodere Kanken, Hickene zones, ende Mauricius Hicken son, [*] bekennen openbare vor alsweme in desser scrift, dat wy uns fruntliken vorenighet, vororsatet unde vruntliken vordreghen hebben mit juncher Ocken, hovetlinge to Broke, Awrike unde Emeden etc. in desser wise alse hir na screven steit. Int erste, dat wy noch nement van unser wegene scolen ofte willen saken ofte veiden up juncher Ocken, sine erven ofte up ere undersaten in Vreslande, wor de beseten sind, hemeliken edder openbar in tokomene tijden. Item so scholen wy noch willen staen noch arbeiden na juncher Ocken sloten, lande ofte luden, alse he de nu jegenwardigen heft in siner besittinge, hemeliken ofte openbare. Item so staen wij brodere unde Mauricius vorscr. juncher Ocken unde sinen erven to alsodanner breve, alse de erwerdige biscob Otto to Bremen seliger dechtnisse in vortijden tusschen beyden partygen ghedegedinghet hefft unde unse elderen mede besegelt hebben to holdene, de sulven breve consentere wy unde bevesten mit dessem openen breve truweliken to holdene unde nummer dar teghens to donde. Item so scholen mit dessen vruntschopen gheleghert unde vorsonet wesen alle olde sake unde twidracht, de tusschen juncher Ocken unde sinen elderen ofte overelderen an de enen sijd, unde unse elderen ofte overelderen an de anderen sijd hebben gewesen, wo unde wanner de ghescheen sint, de solen na dessen tijden mit dessen openen breve gheleghert unde vorsonet wesen, nemant dar mer up den anderen umme an beiden sijden to spreken ofte to wreken to ewigen tijden. Item so schal desse breff alsodaner sone alte wy mit Sibete maket hebben, tu nynen hinder komen. Alle desse articule loven wy broder unde Mauricius vorscr. alse gude kerstene lude juncher Ocken sinen erven unde undersaten stede, vast unde unvorbroken to holdene to ewigen dagen, alle argelist utesproken. In orkunde so hebbe wy brodere vorscr. unde Mauricius unse ingesegele gehangen an dessem breff. Datum anno Domini Mo CCCCo XXVo, ipso die Georgii martiris.
