| Nummer:oub0356 | Datum:10. Juni 1427 | Overlevering:Editie | Vindplaats:Ostfriesisches Urkundenbuch, I, S. 321, nr. 356 |
Die Stadt Bremen, Butjadingerland und Wursten versprechen der Partei des Sibet und Focko Unterstützung, für den Fall die Gegenpartei den durch ihren Schiedsspruch festgesetzten Frieden brechen würde.
Wy borgermester unde radmanne der stad Bremen, sesteyn radgeven unde landlude meenliken der lande Butenyade unde Wursten bekennen unde betugen openbare in dessem breve, dat wy uns hebben vordreghen, voreenet unde vorbunden, vordreghen unde vorbynden in dessen breve mit Sibete to Rustringen, Focken Ukens to Hlere unde Uden to Norden hovetlingen, Imelen to Grymessum, Ennen in der Greed, Imelen Hisseken sone, Hedde Kancken, Tadeke Ammessen, Eppen to Westerbroke unde Wibete van Stedestorpe in desser wise, were dat juncher Ocke van den Broke, de stad van Gronyngen unde de landlude[*] dar ummelang[*] by Gronyngen geleghen, unde de ghenne de van erer weghene unde mit en in de veyde gecomen weren, utginghen der vruntligen schedinge unde sone, de wy borgermester unde rad der stad to Bremen unde landlude der lande Butenyade unde Wursten utgesproken sende uthgesecht hebben twisschen den ergenanten juncher Ocken, den van Gronyngen, eren partyen unde vrunden, unde Sibete, Focken, Uden, Ymelen etc. alle vorbenanten eren vrunden, hulperen unde partyen, alse se an beyden syden vruntliker schedinge unde sone by uns gebleven weren, na ynneholde erer openen besegelden breve, unde se der nicht enhelden unde worane vorbreken, unde uns dar clage over queme van den jennen, den dat vorbroken und nicht geholden worde, unde wy den jennen, den dat brak ghescheen is, nicht konden[*] behelpen ere unde rechtes edder mogelike vruntschop bynnen den ersten maende na der clage over den ghennen de dat vorbroken hefft, so schulle unde wille wy den jennen van welker partye, dem wy des nicht behelpen konen, mit al unser macht in sine hulpe komen up den jennen de des utgheit, solange dat wy em ere unde rechtes edder mogelike vruntschop behelpen konet, unde weme wy ere unde rechtes edder mogelike vruntschop behelpen konen, dat schal malk yo nemen. To betuginge desser vorscr. stucke, de stede vast unde unvorbroken to holdende, so hebben wy borgermester unde radman der stad Bremen unser stad secretum, sesteyn radgeven unde ghemeene landlude der lande Butenyade unde Wursten vorscr. unser lande ingesegele gehangen to dessem breve. Gegeven na Godes bort XIIIIC jar, dar na in deme seven unde twintigsten jare, des dinxedages to Pinxsten.
