| Nummer:oub0357 | Datum:17. Juni 1427 | Overlevering:Editie | Vindplaats:Ostfriesisches Urkundenbuch, I, S. 322, nr. 357 |
Der Bürgermeister Heinrich tor Bruggen von Groningen, der von Imelo von Larrelt und Grimersum gefangen war, verspricht, für den Fall die eingeleiteten Friedensverhandlungen resultatlos verlaufen würden, sich mit mehreren Genossen in Larrelt wieder zu stellen.
Ich Hindrick tho Bruggen borgemeister ihn Groningen, bekenne vor all de gene, de dussen brieff sehen offte hoeren lesen, dat ick mit mynen gesellen hebbe gelavet, mit hande gesekert und mit den munde geswaren Imelen hoevetlinck tho Larrelte und Grimersum und Mellen Synada inthokamende tho Larrelte, alse vangen luide schuldich synnen tho doen, offte dusse soen nicht vullentaegen en wurde, ende offte dusse soen voerscr. by schulde juncker Ockens, der stadt van Groningen offte ore frunde, de ihn dusser veede mede synnen gewest, braken wurde by der Oistersid der Eemse, offte by der Westersid der Eemse in sloeten, in steden, landen und guide mans, de in dusser veede mede gestaen hebben ihn de Ummelanden, als beschreven und gededinget iss nha uthwisinge der soenbreve; ende weert dat dusse soen vullentaegen wurde, so schall ick doich mit mynen gesellen, alse Rickert Frese, lange Hindrick und lange Coenert malck vor sick in Larrelte voerscr. kamen up sant Jacobi dach, Imelen offte synen frunden und Mellen voerscr. unse oirfede doen, gelick ander gevangen, de ihn dusser vede gevangen sinnen, den de soen tho baete gekoemen iss. Ihn orkunde und merer kentenisse der waerheit, so hebben wy borgemeistern und raedt in der stadt van Groningen unse stadtzegell beneden hirup doen drucken umme bede willen Hindrick thor Bruggen. Geschreven ihn dem jaer unses Heren duisent veerhundert soven und twintich, des dinxdages nha sunte Viti dach.
