| Nummer:oub0384 | Datum:24. Mai 1430 | Overlevering:Editie | Vindplaats:Ostfriesisches Urkundenbuch, I, S. 354, nr. 384 |
Graf Johann von Hoya schliesst mit Focko Ukena, Sibet von Rüstringen und anderen Häuptlingen ein Schutz- und Trutzbündniss gegen Stift und Stadt Bremen ab und verabredet den Modus der Beutevertheilung und der Verpflegung der Krieger.
Wy Johann vann Gades genaden grave ther Hoya bekennen und betuigen apenbar in dessem breve, dath wy unss hebbenn voreinigett und vordragenn, vaereinigen und vordragenn in desser schrifft mit Focken Ukens hovetlingen tho Liehr, Sibolt hovetlingh in Rustringen und Ostringen, Imele tho Grimersum, Imele tho Embden prawest, Uken tho Oldersum, Tyie und Udo Focken soens, Enno in de Grietha, Edzardt und Ulrick syne soehns, Wyardt tho Uphusen, Gocke (so) Onnekens, Ike syn broder, Hedde Tannen, Ine Kancken broder, Wibeth van Stedesdorp und Here Onnekens hovetlingen in Frieslanden in desser nabeschreven wise, also dath unser ein dem anderen mit landen und luiden trulicken helpen sall uppe dat capittell, stadt und gantze sticht tho Bremen und uppe die jennen, de des mit ehm tho doende hebbenn edder noch hebben worden, na alle unser macht, und sollen des trulicken und gelofflicken by einander bliven so lange, dat malck dem anderen ere und rechtes van dem vorbenoemeden behelpe, [dat scholen wi beide partien nemandt utgesecht wath binnen beiden und vorwharinge geschehn were (sic)[*]; were ock dath unser vorbenomeden welck bestallet edder bebuwett[*] wurde, dat sall unser und[*] dem anderen mit landen und luiden na alle siner macht truliken helpen weren binnen den negesten vier weken na der maninge, und nicht vreiden edder soenen mit den jenen, dat bebuwet en sy gebroken edder idt en schege mit des gemenen wille dem dat geschen were. Were ock dat wy samptlicken mit der hulpe Gades wes wunnen up Duitscher erden van sloten edder landen, dat schal de edele juncker Johann beholden und na synen willen keren; were ock dat wy samptlick mit der hulpe Gades wes wunnen in Frieslandt, slote offte landt, dat scholen de vorbenompte hovetlinge holden und na ehren willen keren; und wess men wunne van vangenen und name dath soelen [se][*] deelen und buitten na manthale alss sich dat geborde. Were ock sake, dat unser ein dem anderen volgede in sin landt, den sal men mit spise und voederinge[*] besorgen, dewile se in unsen landen syn mit eren vrunden. Were ock dat wy Johann grave vorbenoempt afflivich worden in deser sake offte veyde, dat Godt vorbieden mothe, welcker danne van unsen broderen dat regiment unser heerschap hefft, schall in desse vorhanden wesen, gelicken wy sin. Alle desse articulen und puncten loven wy Johann grave ther Hoya vorsehreven in guder trouwen und ein itlich besunder, und hebben se na mit upgerichteden vingeren stavdes eedes the den hilligen geschworen, statt, vasth und unvolbroken tho holden sunder alle argelisth. Des tho merer bekentenisse hebben wy unse insegell wittlichen hangen laten an dussem brieff. Datum anno Domini MoCCCCoXXXo, feria quarta in rogationibus.[*]
