| Nummer:oub0391 | Datum:10. Nov. 1430 | Overlevering:Editie | Vindplaats:Ostfriesisches Urkundenbuch, I, S. 362, nr. 391 |
Enno Edzardsna an der Spitze mehrerer anderer Häuptlinge und die Gemeinden des Norder-, Brokmer-, Auricher-, Harlinger- und Emsigerlandes machen Frieden mit Udo Hessingha, und gewähren ihm und seiner Gattin Hima den freien Genuss der Itzingaschen Güter, auch versprechen sie ihm Schutz und Vertheidigung für sich und seine Anverwandten.
Wy Enno Edzarsna hoevetlinck tho Greetzill, Wiptet hoevetlinck tho Esense, Wiart hoevetlinck tho Uphusen, Sibrant hoevetlinck tho Edelsum, Edzardt und Ulrick, Ennen soens, und wy gemene meente und inwoners ihn Norder, Brocmer, Auriker, Harlinger und Eemsige lande entkennen und betuigen apenbaer ihn dusser schrifft, dat wy uns samtlichen hebben voreniget und vorsoenet, enen steden vasten unvorbraken frede gemaket mit Uden Hessingha[*] ihn dussen vorworden und beschede, dat Ude voerscr. unde Himba syn huisfruwe[*] und ere rechte arven und anarven scholen bruiken ihn guiden frede, velicheit und sunder vordreet all Itzinge guidt, het sy bewegelick offte unbewegelich, also he dat entfangen hefft mit syner huisfruwen und int lateste vorleet, do he van Norden toech, und van nemande nha dusser tidt hebben anclage offte tosprake, he sy rick offte arm, de clage sy grot offte cleene, het sy gescheen waer idt gescheen sy, vor synen tiden offte by synen tiden, van wat maneren se sy, und wo de gescheen moegen, alle heemeliche valsheit uthgespraken. Ock scholen Ude und Himba voerscr. und ore rechte arven bruiken und beholden alle rechticheit van vindtguidt und ander rechticheit, alse fruw Gudelet[*] ihn vortiden hefft gedaen und er van rechte anarvet iss, und alle guider van inguide, [*] clenodie und ander guide van wat manier, dat sy luttich offte grot wo idt bewegelich sy, dat tho Aurick up den sloete iss, [*] sunder vordreet tho Norden tho bringende und ihn guiden frede tho brukende. Und weer saeke, dat Ude voerscr. hirbaven wen mit unrecht overvallen wulde und overlast tho bringende, dat willen wy voerscr. hoevetlinge und lande keren mit aller macht und wedersprake. Ock wille wy em behulpelich wesen tho manen syne penninge schulde (tho manen) ihn den olden und nien lande, de em beborget iss, und vor dussen tiden schulde betaelt wesen. Ock willen wy voerscr. hoevetlinge unde lande synen vader, swager offte frunde nicht schaeden mit liff offte mit guidt, heemelich noch apenbaer, und alle de guiden mans und soldeners van Duitschen und Fresen, de ihn dusser vede up dem sloete hebben gewesen, fry, velich lives und guides tho wesende und tho woenende up or egen waer idt one belevet; weer ock weme wat gegeven van dem sloete ihn geloven, dat schall men enen ideren wedergeven und betaelen nha guider luide seggent. Ihn urkunde und merer tuechenisse dusser voerscr. articulen und puncten by vullmacht stede, vast, unvorbraken sunder argelist tho holdende und tho blivende, so hebben wy Enno, Sibrant, Wiart und Edzardt voerscr. unse ingezegell vor uns, unse gemeene Eemsigerlande gehangen laten ahn spatium dusses brieves, und wy gemeene Aurikers des abbetes ingezegell tho Ile witlichen gehangen laten ahn dussen brieff, des wy nhu thor tidt brukende sint um gebreck unses egens, und wy alle hoevetlinge und lande vorgeschreven laven ihn guiden truwen und hebben so geswaren mit upgerichteden vingeren, stavedes eedes tho den hilligen stede und vast tho holden sun der argelist. Datum anno Domini dusent veerhundert deertich, ahm avende Martini episcopi.
