Vertrag der Häuptlinge Hayo Harlde und Lubbo Onneken mit den Bürgermeistern zu Bremen wegen des Besitzes der Sibetsburg, welchen die Häuptlinge für sich zu, erlangen streben und dafür die Burg von Bremen zu Lehn empfangen wollen.

Wy Haye Harldes unde Lubbe Onneken bekennen unde betughen openbare vor alsweme in dessen breve, dat wy myt den ersamen her Diderike Schorhare, [*] her Johanne Brun Diderkes, [*] her Johanne Vresen[*] unde her Hermen van Gropelinge, borgermeisteren to Bremen, dar jegenwardich weren Eymer Alverkes unde Dure Hayesson, [*] hebben vorhandelt, gedegedinget unde beredet, dat de ersame rad van Bremen by den ersamen steden scholen unde wyllen bearbeyden, dat wy dat slot Sybetesborch mogen besitten unde beholden unde dat vurder wes beteren unde vesten na rade der stede und des rades to Bremen, unde de ergenante stede de van Bremen, de ore unde den kopman dar getruweliken van to vordegedingen unde to beschermene, unde ene gude vorwaringe don vor uns, unse erven unde nakomelinge so vakene, alz en des to donde is to erem seggene, dat wy van deme vorgescreven slote Sybetesborch nenerleyge schaden noch enginge[*] deme ghemenen kopmanne edder nemende don schullen noch en wyllen edder don laten, sunder den kopman truweliken vorbidden unde vordegedingen, so vorgescr. steyt. Unde wy unde unse erven van kinderen to kinderen wyllen unde scholen dat vorg. slot van deme ersamen rade to Bremen to erer unde to der gemenen stede hand to lene entfan unde unse erven vorg. scholen ene alsodanne vorwaringe don alz wy en ghedan hebben. Unde dat vorg. slot schal der genanten stede und der van Bremen ere opene slot wesen to nuden unde to noden. Were aver, dat de ergenante rad van Bremen by den ersamen steden des nicht vorarbeyden unde vinden konden, dat wy dat vorg. slot Sybetesborch besitten unde in vorgescr. wyse beholden mochten, so scholen wy unde wyllen bynnen den negesten achte dagen dar na, alz uns de ersame rad van Bremen dat vorscryven unde wytlik don, van deme vorg. slote Sybetesborch myt den unsen samptliken affgaen unde de borch, alz de nu is, sunder hode stan laten. Alle desse vorg. stucke loven wy Haye unde Lubbe vorb. vor uns, unse erven unde nakomelinge deme ergenanten rade to Bremen to truwer hand mede der vorg. stede in guden truwen unde hebben dat na myt unsen upgerichteden lyffliken vingeren staveder ede to den hilgen gesworen stede, vast unde unvorbreken to holdene sunder alle list. Des to merer betuchnisse hebben wy unse ingesegele to desseme breve ghehangen. Datum anno Domini M^oCCCC^o XXXV^o, des mydwekens vor den sondage Judica.

x

x

Fonds	Ostfriesisches Urkundenbuch, I
Fol.nr.	S. 401
Nr	442
Olim	Nach dem Orig. im Archive zu Bremen (a). eine Abschrift Saec. XVI (b) im Grossherzoglichen Archive zu Oldenburg. Hiernach gedr. bei Ehrentraut, Fries. Archiv I, S. 505.
Jaar	1453
Datumcode	EaJudica

x

x

Commentaar	Siegel: 1. in einem Dreipass ein Wappenschild mit rechtsaufgerichtetem Löwen. Sigillum Haionis Harlde. 2. Rechtsaufgerichteter Löwe. S. Lubonis

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 442