Das Kirchspiel Etzel unterwirft sich dem Grafen Dietrich von Oldenburg.

Wy Yneke unde dat ganse karspel to Etzele enkennet openbare in dessen breve vor allesweme, dat wy uns lefflicke unde vrunliken hebben vordregen unde vorgan myd dem eddelen juncher Didericke, greven to Oldenborch, unde synen erven in sulker wis so hir nascreven steit: dat wy en willen und scholen to ewigen tiden truwe unde holt wesen, dewile dat wy leven, unde nummermer ere argeste to donde oft tho wetende, noch dages eder nachtes hemeliken ofte openbar. Oh so wille wy unde scholen en yewelik in unseme kerspele wanaftich utgesproken Yneke, greve Diderike unde synen erven vorben. des yars to allen sunte Vites dage achte Bremer grote to knechtgelde geven unde en yewelik darto des yars to allen sunte Michaelis dage malk ene tunnen haveren, unde den wille wy unde scholen en yo lesten to deme Konenvorde.[*] Wer ok, dat yenige in unseme kerspele tiegen greve Diderike unde synen erven ofte eren amptluden wes vorbreke unde tiegen se besecht worden, eder oft unser een dem anderen wes to to seggende hedde, we darumme beschuldiget werd, de mach dat vorborgen unde sik des entladen na Vreschen rechte, oft he kan; kan ha overst nicht, so schal he dat den greven ofte synen erven vorscreven beteren na guede ofte na rechte, unde wo dar nyne schuld an en heft, de en derff des nicht entgelden; unde en alle desse vorscreven stucke, articule unde word unde der en yewelik bisunderen loven wy Yneke unde dat ganse kerspel to Etzele vorben. den edelen greve Diderike unde synen erven vorscreven in guden truwen in dessen breve stede unde vast to holdene, unde hebbet dat na mit unsen upgerichteden liffliken vingeren stavedes edes to den hilgen geswaren sunder alle nygevunde, hulperede unde argelist utgesproken, unde hebbet des to tuge wy Yneke unde ganse kerspel vorben. mit guden willen unse ingesegele witliken gehangen laten to dessen breve. Na der bord Christi verteynhunderd yar, darna in deme sess unde dertigesten yare, des mandages to Paschen.

x

x

Fonds	Ostfriesisches Urkundenbuch, I
Fol.nr.	S. 412
Nr	452
Olim	Orig. im Grossherzoglichen Archive zu Oldenburg. Gedr. Ehrentraut, Fries. Archiv I. S. 490.
Jaar	1436
Datumcode	LpPasche

x

x

Commentaar	Siegel: 1. Wappenschild mit rechtsgewendetem Adler. s Inneke hovet. to Etsel. 2. Ein Geistlicher mit Stab und Buch, auf dem Kopfe die Mitra. S. des kerspels segel to Eitel.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 452