Heddo, Tanne und Mauritz Kankena u. A. versprechen unter Einlagerverbindlichkeit ihre Bürgen, welche sich beim Grafen von Oldenburg für sie verpflichtet haben, schadlos zu halten.
Wy Hedde, Tanne unde Maurisseke, geheten Kanken, junge Dide, junge Mense unde Haye Haynges enkennet openbar in dessen breve vor allesweme, dat wy unde unse erven scholen unde willen schadelos holden unde maken de ersamen vrome beschedenen lude Diderike Bardewisch, Woltere van Bolland, Helmerike unde Johan brodere geheten van Fikensholte unde Reynbert Bernebuer, knapen, unde borgermesters unde radmanne to Oldenburc unde ere erven unde nakomelinge der lofte unde ede, de ze vor uns gedan hebben dem eddelen juncheren Diderike, greven to Oldenburc unde Delmenhorst unde synen erven unde eres breves holderen vor dusent gude Arnoldesguldene, hertogen to Gelre, gud van golde, recht van munte unde swar genoch van wichte, alse nu tor tyd to Bremen vor der wessele an tale unde munte ghinge unde geve synt, up de ver hilgen dage to Paschen negest to komene na gifte desses breves, na utwisinge des breves, den ze darup hebben, unde vortmer vor ene last botteren; unde were dat de ergenante borgen ofte ere erven unde nakomelinge der lofte unde ede in yenigen schaden quemen, dar schole wy unde unse erven unde willet ze sunder eren schaden deger unde al von entweren, beyde van hovetgude der vorscr. dusent guldene unde der last botteren, unde van allen schaden den ze der geleden hebben to eres sulves seggende sunder ede, also vro alse wy ofte unse erven ofte unser en van en edder erer en darumme manet werden by boden ofte breven; ofte wy Hedde, Tanne, Maurisseke, junge Dide, junge Menso, Haye Haynges vorbenant ofte unse erven scholen unde willen na der manynge unvortoged samentliken ofte bysunderen, unsen nyn myd den anderen dat to vorholdende, riden in bynnen der stad to Oldenburch unde gan dar in ene menen herberge, dar ze uns dan inwisen edder inwisen laten, edder erer en, unde holden dar en recht inleger stedeshen, nenewiis dar wedder ut na legers rechte noch dages edder nachtes, wy en hebben ze erst unde tovorn der vorscr. lofte unde ede sunder eren schaden deger unde al so vorscr. ys na eren willen wol entworen unde so schadelos benomen alse ze des dages weren en ze desulven lofte unde ede alle unde en itlik bysunderen deden. Wer ok dat unser vorbenant sakewolden yenich aflivich wurde er den ze der vorsc. lofte unde ede, so vorscr. ys, wol entworen weren, dat God doch unsten mote, wo dicke dat schege, zo schole wy anderen, de dan dat lenger lif hebben, unde willen bynnen achte dagen darna, wanner wy van de vorscr. borgen ofte eren erven ofte nakomelingen darumme manet werden ofte erer en, en unvortoget enen anderen guden man to uns in des doden stede setten, dar en an genoge, de en love unde swere in enen willekorsbreve besegeld myd synen ingesele dessen hovetbreff mede to holdene na syner utwisinge, unde darmede schall desse breff by zyner vullen macht stande bliven in allen stucken, alse de nu ys zo lange, dat wy ze der lofte unde ede wol entworen hebben, zo vorscr. ys. Alle desse vorscr. stucke love wy Hedde, Tanne, Maurisseke, junge Dide, junge Mense unde Haye Haynges vorbenant samentliken in guden truwen in dessen breve, unde sweret unde hebbet de myd samender hand gelovet unde gesworn myd upgerichteden vingeren stavedes edes in den hilgen vor uns unde unse erven den vorbenanten borgen unde eren erven unde nakomelingen stede unde vast to holdene sunder argelist, unde hebben des to tuge wy Hidde, Tanne, Maurisseke unde junge Dide vorbenant unse ingesegele, der wy junge Mense unde Haye vorbenant mede bruken, witliken hangen laten to dessen breve. Datum anno Domini MoCCCCoXXXo septimo, ipso die sancto natali sancti Wyllehadi.
x
| Edities |
E. Friedländer, Ostfriesisches Urkundenbuch I (Emden 1878), nr. 482 |
