| Nummer:oub0500 | Datum:16. Sept. 1438 | Overlevering:Editie | Vindplaats:Ostfriesisches Urkundenbuch, I, S. 445, nr. 500 |
Die Gebrüder Eyben tauschen mit dem Kl. Marienkamp Ländereien bei Margens gegen andere in Brokmerland aus, und verkaufen dem Kloster einen Hamm.
Wy Heer Ommen Eyben ende Tamme Eyben ghebroders tughen ende bekennen in desen apenen brieve voer ons ende onse rechte eerfghenamen, dat wy myt vryen wille ende myt voerghedachten mode hebben vermanghelt, verbutet ende verwysselt erflick, wytlick, ewelick ende onwederroeplick mit den eersamen prior ende convente Marienkamp des cloesters, anders ghehieten Esinghervelde, van der Reguliers canoniken oerde, gheleghen in den kerspele van Ezenze, onse vier dymethe, die wy ligghende hebben toe Merghense in des voerscr. cloesters voerwerck, daer wy voer hebben vier dymethen in Borchmerlant[*] tot onsen wyllen. Oeck bekennen wy voer ons ende onse rechte eerfghenamen, dat wy den eersamen prior ende convente voerscr. hebben vercoft enen ham, gheleghen in Ettenlant, by Marghenze oer voerwerck voerscr. voer ene sekere summe gheldes, die ons al ende wal betaelt is tot onsen wyllen; ende bekennen dat wy voertan gheen recht noch ansprake en beholden noch machtende synt an desen voerscr. lande tot enyghen tyden. Ende dat wy oeck gheen lant meer ligghen en hebben in Ettenlant voerscr. of by Ettenlant, noch oick in Merghenzer lant, des voerscr. cloesters voerwerck, alle arghelisten utghesproken. Hyr waren an ende over eersame lude, als her Wypt van Stedesdorp hoeftlingh ende richter in Herlinghen, her Hayng ende her Heere kiercheren toe Ezens ende jonghe Mense van Nortdorpe.[*] In een tuych der waerheit, soe hebbe ick Heer Omme voerscr. mynen seghel an desen breeff doen hanghen, ende omme meerre sekerheit ende tuchnisse, soe hebben wy Heer Omme ende Tamme vorscr. ghebeden Wypt van Stedesdorp hoeftlingh ende her Hayng kerckheer voerscr., dat sy oer ingheseghelen an desen breeff hebben doen hanghen. Ghegeven in den jare ons Heren dusent vierhondert ende achtendertich, op sunte Lamberts avent, des heilighen bisscops ende martelers.
