| Nummer:oub0502 | Datum:27. Sept. 1438 | Overlevering:Editie | Vindplaats:Ostfriesisches Urkundenbuch, I, S. 446, nr. 502 |
Die Häuptlinge von Dornum und Hinte verkaufen dem Pfarrer Ulrich zu Nesse einen Warf, der mit einem Gemüsegarten bepflanzt ist.
Wii Mauricius, hoefftling tho Dornum, unde Hayke, hofftling tho Hynte, doen witlik unde kundich allen guden luden, de dessen breeff zeen of horen lesen, dat wii myt consent unde vulboert unser echten husvrouwen, alse Ette unde Hebe, hebben vorkoft vryes kopes to ewigen tyden den vromen heren herren Ulrick, kerchere tho Ness, enen werff, als de nu tor tyt gedolet unde getekent in myt enen koeltune, als daer je to gewesen heft, gelegen up de noertsyde Haye Edelinge werve bii der bure middelweghe, bii der sudersyt unses werves, daer Ocko Jurien nu tor tyt up syt, voer acht unde veertich Arnsche gulden, den gulden to reken vor viifteyn krumstert; welk gelt uns beiden vul unde al na unsen willen wal betaeld is. To welken vorscr. werve her Ulrick vorben., syne kyndere[*] unde erve, schal hebben unde bruken den wagenwech, gelegen tuschen unsen unde synen gekoften werve to ewigen tyden, unbehuset, umbetymmert unde umbehyndert sunder jenigerleye weygerynge edder weddersprake. Welkeren vorscr. werf myt syne tobehorynge wy Mauricius unde Hayke vorbenomed herren Ulrich, synen kynderen unde synen erven leveren vry unde unbekummert vor uns, unsen erven, boren unde ungeboren, unde vor alle ansprake unser ofte jemande van unser wegen sunder jenigerleye argelist unde nye vunde. Hiir hebben an unde over gewesen her Reyner kerchere to Eerle, her Ysebrand medekerchere to Norden, Tanne hoefftling to Dornum, Thyarck Ubben, Eme Allen unde anders vele guder lude. In oerkunde desser waerheit, zo hebben wy Mauricius unde Hayke vorscr. unse beide segele witliken gehangen an dat spacium desses breves, unde voertmeer umme merer bekanntnisse der waerheit unde vulboert des vorscr. kopes, zo hebben wy her Reyner, her Ysebrand unde Tanne vorb. unse segelen witliken gehangen an dessen breeff umme bede willen van beyden syden. Gescreven int jaer onses Heren dusent vierhundert acht unde dertich, up den dach Cosme et Damyani martyrum.
