| Nummer:oub0541 | Datum:12. Juni 1442 | Overlevering:Editie | Vindplaats:Ostfriesisches Urkundenbuch, I, S. 475, nr. 541 |
Tanno Kankena cedirt dem Häuptling Ulrich von Norden usw. die Burg zu Dornum und den Idzingheerd mit allen ihren Pertinenzien und Gerechtigkeiten.
Vor alle den gennen, de desen breeff zeen offte horen lesen, bekenne ick Tanne Kancken openbaer in deesen sulven brefe, dat ick mid[*] vulboord miner rechten nechsten erven unde aller der geenen, de dat van rechte vulborden scholen, hebbe overgheven unde vorlaten, overgeve unde vorlate jegenwardigen in krafft deses brefes dem eersamen Ulricke tho Norden, Auricke ende Esense etc. hovetlinge, unde sinen rechten erven, de borch tho Dornum unde alle heerlicheit, rechtigheit unde thobehorungen, unde mit dem gerichte, hogesten ende sydesten, over alle de meyeren unde guderen, alse de myner huesvrouwen mit dersulven borgh tho Dornum van dode oeres vaders erfflicken angevallen, unde alse an my gekomen sind; men wat jaerlicks kumpt van hure van sodanen vorscr. guderen, dat mogen und scholen ick und myn huesvrouwe unde unse rechte erven erfflicken beholden unde des bruken tho unsen willen. Vortmeer hebbe ick Tanne Kancken overgheven unde vorlaten, overgeve unde vorlate jegenwardighen deme ersamen Ulricke unde sinen rechten erven Idzingheerd mit alle siner heerlicheyd, vryigheyd, rechtighkeyd, meyern, tinse, renten, upkomede, wischen, weyde, ackeren gebouwet unde ungebouwet, unde met aller siner schlachtenut[*] und thobehoeringe van watte namen de sind, unde wer de in Norder olde unde nye lande unde in anderen plaetsen unde steden sind belegen, nichtes uthgescheiden, so dat de eergen. Ulricke unde sine erven sodane vorscr. guderen erfflicken mogen und scholen beholden, unde der bruckachtig wesen nach oeren willen tho ewigen tyden; unde ick und myne huesvrouwe unde unse beyder erven offte jemand van unser wegen, geestlick offt werltlick, willen und scholen uppe desser vorscr. guederen samptlicken offte bysundern nummermeer saken, unde den gen. Ulricke unde sine ervens offte de besittere der vorscr. guderen, weer et dat de van demselven Olricke unde sinen erven an jemande anders quemen, binnen edder buten geistlicken edder werldlicken gerichte offte jenigerley wyse anders, daer nicht umme schuldigen unde beklagen in neenen toekomenden tyden. Alle deese vorscr, stucke samptlicken unde bysunderen, hebbe ick Tanne Kancken vorb. deme ergen. Ulricke unde sinen erven unde alle den geenen, daer dese vorscr. gudere ankomen werden, vor my unde myne erven, mit mynen upgerichteden lyfflicken vingeren stavedes[*] eedes tho den hilligen uppe deesen breff gelovet unde geschworen, love unde schwere de jegenwardigen in unde mit krafft deses brefes, stede unde vast sunder alle list unde behelpinge ewiglicken tho holden, unverbroken. Unde des tho eener grooteren witlichheid unde bekandnusse, so hebbe ick myn ingeseegel wittlicken unde mit guden willen tho desen breef heten hangen. Und ick Hidde Kancken, des vorben. Tannen broeder, unde Mauritius Kanckens, dersulven Tannen unde Hidden vetter, bekenne ock an desen sulven brefe, dat alle vorscr. stucke mit unser wittschop, vulboord unde guden willen gescheen sind, unde hebben tho desto groteren seekerheyd unse ingesegele mede aen desen breeff heeten hangen. Unde wy borgermeistere unde radmanne der stadt Hamborg doen ock witlick in desen brefe alle den geenen, de one seen edder horen lesen, dat ons witlick unde erkand is, dat alle vorgeroerde puncte in vorscr. wyse twischen den eerbaren Ulricke unde Tannen Kancken verhandelt, gescheen unde geschloten sind, unde daerumme hebben wy, dorch derselven Ulrickes unde Tanne Kancken vrundlicken bede willen, tho eener groteren bewysinghe, unser stadt secretingeseegel mede heten hangen tho deesen breefe. Geven na Godes geboort veerteinhundert jaer, daerna in dem twee unde veertigsten jaere, des dingsdages voor sunte Viti daghe.
