| Nummer:oub0544 | Datum:14. Juli 1442 | Overlevering:Editie | Vindplaats:Ostfriesisches Urkundenbuch, I, S. 481, nr. 544 |
Die Kankena werden Vasallen der Grafen von Oldenburg und versprechen ihnen treu und hold zu sein.
Wy Hedde, Tanne brodere geheten de Kancken, unde Marisseke Kancken, bekennen openbare in dessen breve vor allesweme, dat ons de erwerdigeste in Gode vader unde here, her Nycolaus, oldinges ertzebischop to Bremen, unde de eddelen greven Kersten, Mauricius unde Gherd, alle greven to Oldenborch unde Delmenhorst, hebben entfangen vor ere denere unde knechte, unde willen uns truweliken vorbidden unde vordegedingen to unsen rechten saken, war uns dis noet unde behueff ys, unde des schole wy unde willet en unde eren erven to ewigen tiden, dewile dat wy leven, wedder truwe unde holt wesen unde nummermer ere argeste don ofte den laten noch dages eder nachtes, noch hemeliken ofte openbar. Wer ok yement, de de vorbenante heren myd unrechte overvallen wolde, dar wy erer mechtich weren to eren unde to rechte to, des wille wy unde scholet by en truweliken bliven na alle unsen vormoge; unde en alle desse vorscr. stucke love wy Hedde, Tanne unde Marisseke erbenant den vorscr. heren unde eren erven in guden truwen in dessen breve stede unde vast to holdene sunder argelist; unde hebbet des to tuge wy Hedde, Tanne unde Marisseke vorbenant unse ingesegele to ener mereren bewisinge witliken gehenget laten to dessen breve. Na Godes bord dusent verhundert darna in deme twe unde vertigesten yare, am hilgen dage sunte Marien Magdalenen,
