| Nummer:oub0608 | Datum:6. Febr. 1449 | Overlevering:Editie | Vindplaats:Ostfriesisches Urkundenbuch, I, S. 535, nr. 608 |
Der Propst und der Amtmann von Emden schlichten einen Streit zwischen dem Propst Sibrand von Langen und Arnd bi der Brugghe wegen des Vorwerks Bohnenburg und dessen Verpachtung.
Wy Johannes Vredewolt, provest unde kerchheer to Eemden, unde Johan Gerwer, amptman daerselves, bekennen unde betugen openbaer voer allesweme, dat wy sodane scelinghe, alse die eersame heer Sybrand provest to Langen hadde mit Arind bi der Brugghe van des voerwerken weghen gheheyten de Bonenborch, hebben belecht unde to eenen gansen ende vruntliken ghesceyden in desser wyse naghescreven, dat desse voerben. provest heeft dat voerwerck van Aernde voerscr. weder ontfangen unde scal den huerman desse gueden beholden ende bruken laten seven jaer lanc na sunte Mertens daghe negest comende, unde de huerman scal de husinge dichte under dake holden binnen desser tiit in alle mate unde manier, so Arind voerscr, mit hem heeft besceyden, unde desse selve huerman scal dessen eergenanten provest edder den convente jaerlikes huere geven viif stige coepmans Arensgulden unde 24 crumstert alle sunte Mertens dach betalende, in achtedaghen onverhaelt, so sal die huere jo voer Wynachten gansliken betaelt wesen. Des to tughe hebben hier yeghewoerdich mede by an unde over ghewesen Albert Tideken unde Scelteko Campen, borghemeysters to Emeden, Erd van Tornum lantrichter in Emisgherlande unde anders vele guede luden. In orkunde der waerheit so hebben wy Johannes Vredewolt unde Johan Gerwer voerscr. um eerre beden wille to beyden tziden unse ingesegel witliken unde mit goeden wille upt spacium dessen brieves ghedrucket. Na der boerd Christi MoCCCCoXLIXo jaer, in den daghe sancte Dorethee virginis.
