| Nummer:oub0622 | Datum:24. Jan. 1450 | Overlevering:Editie | Vindplaats:Ostfriesisches Urkundenbuch, I, S. 543, nr. 622 |
Die Häuptlinge Ulrich von Norden usw., Lutet Manninga zu Bargerbuhr u. A. schenken dem Haitad zu Lintel den dritten Theil der Stätte und des Hauses, welchen Uptad Remedsna den Ausstellern der Urkunde, bez. deren Vorfahren, geschenkt hatte.
Wy Olryck tho Nordenn, Auwerke, [*] Brockmerlande, Esenze und Lengen etc. hovetling, Lutet Manningha to Bergum und Pewesum hovetling, Meynd Jelbersna, Mercol[*] und Haro Tetten enkennen und betugen apenbar in dussen breve vor alle ersamen vromen luden de ene zeen, horen offte lesen, und vor alsweme, dat wy umme gunsten und vruntschopp willen geschenckt, upgedregen und ghegheven hebben den vromen manne Haytad tho Husem, wonachtich to Lyntelen, [*] und synen kinderen den derde part stede und huses, den zalige Uptad Remedsna by walberadene mode und nuchterens synnes zalige Edzarde und Bene Jelbersna, den God genade, myt uns Lutet Manynga, Marcol und Haro Tetten alle vorbenoemde an syn huyss unde an syn huses stede gegheven hevet uns und unsen erven, dar wy Olryck und Meynd vors, van ervetals wegene an gerechticheyt unde egendom der stede und huses des derden partz vorg. mede gekomen synen. Und wy alle vorgenanten laten und updregen zamptliken an dusser schrifft den vorg. Haytad und synen erven den vorbenoemde partz stede und huses in ere vullen vasten und steden unvorbreckliken besittinge und were, erfflick egen to brukende na erem willen und bequemheyt, sunder unse offte unser erven wedersprake, und hebben den rechten hovedbreeff, den uns Uptad zalige dechtnisse darup gaff, Haytad gedaen und gegheven, em und synen erven to denende und andrepende van des derden partes des huses und stede wegene allene in allen mate, alze hee up uns und unse erven inholdene is, to bruckende; und wy Olryck und Lutet hovetlinge vorbenoemdt hebben dusses to merer bekantenisse und bewysinge unse segele witliken heten hangen an dussen breff, de[*] wy Meynd, Mercol und Haro ergenant tor kentenisse unses willen und vulborde alle dusser vors. puncte hebben gebeden, und[*] Alberts kerckheren to Hage syn segell vor uns an dessen breff dede hangen, [*] den ick Albertus to Hagen kerckhere umme erer bede willen to vurder orkunde also gedaen hebbe. Datum anno Domini duysent veerhundert vyfftich, in profesto beati Pauli conversionis.
