| Nummer:oub0624 | Datum:30. März 1450 | Overlevering:Editie | Vindplaats:Ostfriesisches Urkundenbuch, I, S. 544, nr. 624 |
Der Propst Gerald von Aland, der Pfarrer Aydo zu Wirdum und der Häuptling Abeko zu Loppersum bekunden, dass Bolko Hillena dem Häuptling Aild Beninga zu Grimersum mehrere näher bezeichnete Grundstücke geschenkt habe.
Wy Geraldus, provest to Aland, Aydo, kerchere to Wyrdum, unde Abeko, hovetling to Lopsum, don wytlik unde kundich allen ersamen vromen luden, de dussen breff zeen, horen offte lesen, wo dat Bolko Hillena vor uns bekant hefft, dat he myd vryen wyllen by sunden lyve unde vulberadene mode hefft upgedregen unde gegheven unde gaff darzulves an unse yegenwordicheyt in enen rechten steden eweliken unvorbreckliken gave dem vromen manne Aylde Benynga, hovetlinge to Grimessum, vyff grase boulandes in Grymessumer hammerke belegen, geheten inna dieck-eckeren, eyn gras ynna longa-eckeren, eyn gras inna Aylda Wylmeed, dre grase sunder eyn sestendey1, [*] welk vorg. lant ik Bolko den vorben. Aylde in dusser wyse hebbe gegeven, dat ick, myne erven offte anerven, geborn unde ungeborn, dyt ergen. lant nummer up Aylde vorg. unde syne erven anspraken scolen, men he mach dat lant vorkopen, vorsetten offte vorwesselen, wor om bequeme is, sunder myne offte myner erven weddersprake offte (insage), [*] unde wy Ayld unde Bolko hebben zamptliken gebeden dussen vorg. heren Geralde provest unde Ayden kercheren unde Abeken hovetlinck vorben. umme ere segele an dussen breff to hangende, dem wy Geraldus provest, Aydo kerchere unde Abeko hovetlincg alle vorgen. umme erer fruntliken bede wyllen, na dem uns dusse gave vorg. wytlik ys, also gedaen hebben (unde) unse segele to merer tuchnisse wytliken an dussen breff gehangen. Datum anno Domini MoCCCCo quinquagesimo, des mandages na Palmen.
