| Nummer:oub0632 | Datum:18. Sept. 1450 | Overlevering:Editie | Vindplaats:Ostfriesisches Urkundenbuch, I, S. 550, nr. 632 |
Der Pfarrer Albert zu Hage und die Häuptlinge Tanno Kankena zu Dornum, Poppo Manninga zu Bargerbuhr und Gert ass Petkum geloben, den zeitweilig freigelassenen Hero Mauriz zu Dornum binnen 6 Wochen wieder an Tanno Duren zur Haft einzuliefern oder 1000 Rh, Gulden Strafe zu zahlen.
Wy Albertus to Hagen kerckher, Tanno Kancken to Dohrnum, Poppo Manninga to Bergum und Pevessum, und Gert to Petkum hovetlinge bekennen und betuigen apenbar vor allen christenluiden, de dyssen bref seen ofte horen lesen, dat wy hebben gelavet und guetgesecht, laven und seggen guet jegenwardich in und mit dissem breve dem ersame Tanno Duren to Jever, Rustringen, Ostringen und Wangerlande hovetlingen und synen erven, vor Heren, Mauricii Kancken sone, wanhaftich to Dohrnum, de des vorscr. Tanno Duren to Jever etc. hovetlinges rechte fangen und mit ehren gegrepen is, in dysser wise und manere, dat wy den vorbenompten Hern Mauricii willen und schollen ses weken levendich ofte doeth na gifte dysses breves wedder inleveren, and worden und personlicken to Jever bringen in des vorscr. Tanno Duren to Jever etc. hovetlinges hechte, veste, stocke, krampen und blocke, dar den vorbenompten Hern hebn uthgeborget und de vorschr. Tanno Dosen to Jever uns des tobelovede; unde oft wy nicht en vormochten, konden ofte en wolden den vorbenompten Hern Mauris Tannen Duren rechten vangen wedder to leverende, antwordende unde personlichen to Jever ses weben na gifte dysses breves to bringende in des genanten Tanno Duren to Jever etc. hovetlinges hechte, veste, krampen, stocke unde blocke, so willen und schollen wy mit rechte plichtich syn dem vorschr. Tanno Duren ofte synen rechten erven dusent Rinsche gulden to gevende, to betalende und vornogende unde de helfte des geldes willen und schollen wy betalen und vornogen dem vorschr. Tanno Duiren ofte synen rechten erven tho mitwinter erstkomende na gifte disses breves und de ander helfte der vorschr. summen geldes willen und schollen wy betalen in den ver hilgen dagen to Paschen dar negest folgende, und den Rinschen gulden tho rekende vor 32 krumpstert; und dysset reden unde laven wy her Albert to Hagen kerckher, Tanno Kancken to Dohrnum, Poppo Manninga to Bergum und Pewessum, unde Gert to Petkum hovetlinge unvorbraken in guden truwen to holdende als vorschr. is sunder jenigerley argelist, hulperede, niefunde, dat ick her Albert to Hagen kerckher vorbenompt hebbe geredet unde gelavet by myner erenwitticheit und presterschup, und wy Tanno Kancken to Dohrnum, Poppo Manninga to Bergum und Pewessum und Gert to Petkum, hovetlinge, hebben besundern und samptlichen desgelykenn gedaen by unsem gude, ehre, lofte unde ede. Dessen to mehrer bewisinge unde kentnisse der warheit, hebben wy her Albert to Hagen kerckher, Tanno Knacken to Dohrnum, Poppo Manninga to Bergum und Pewessum, und Gert tho Petkum hovetlinge unsse rechte ingesegel hangen laten to dyssem breve. Datum anno Domini MoCCCCoLo, am negesten dage beati Lamberti.
