| Nummer:oub0638 | Datum:10. Juni 1451 | Overlevering:Editie | Vindplaats:Ostfriesisches Urkundenbuch, I, S. 555, nr. 638 |
Graf Gerd von Oldenburg schliesst mit Junker Ulrich von Greetsiel Frieden.
Wy Gherd van Gotz gnaden, greve to Oldeborch unde Delmenhorst, enkennen unde betuegen klaerlichen in dessen breve voir allen ersamen vromen lueden, de ene zeen, huren effte lezen, dat wy uns myd den ersamen vromen manne junckhern Oelryke, to Grietzyl, Norden, Awrik, Brockmerland, Ezense unde Lengen etc. hovetlingh, unde myd synen frunden leefflichen hebben vorenyghet unde vordregen, unde ghenslichen enwechghelecht unde gesleten allen unwillen unde twidracht tuschen Vrieslande unde der herscap van Oldenborch, in voirtyden wente up dessen dach gesaket unde vorresen. Unde voirt soe hebben wy (ene) bestantlike vaste sone unde ewigen vrede vorramet unde ghemaket tuschen uns unde unsen frunden an beyden syden der herscap van Oldenborch unde Vrieslande sunder jenygerleye intocht effte argelyst eweliken to durende, in desser nabescreven wise: Int erste soe schollen alle de breve, de juncker Dyderick zeliger dechtnisse unde syne voerfaderen, greven to Oldenborch, Vrieslande effte den hovetlingen dairsulvest hebben bezegelt unde gegeven, myd dessen jegenwordigen breve gheconfirmeert unde ghesterket by erer vollen macht vastliken nae lude unde inholde to blyvende unde to holdene, seo dat wy Gherd van Gotz gnaden vorbenant unde unse frund nu unde to ewygen tyden nergenmede sollen effte willen krenken, vornederen effte breken sodane breve; unde weer dat jenigen breve wairane to kort schuede, dat queme to woe id to queme effte in wat mathe dat vorrese, unde wy by deselven breven geeischet woerden, soe willen wy unde sollen vorder dair neue hulperede effte voirtoegherynge anne maken, wy en holden de breve by erer vollen macht, unde nae luede unde nae inholde uns dairby hebben, unde voirtfaren sodane gebrek to vlygende, unde hyrmede ys gelegert unde ghevlegen alle unwille unde twidracht in voirtyden tuschen Vriesland unde der herscap van Oldenborch, wente to nun up dessen dach, alze dat datum desses breffs uthwyset, myd rove effte brande vorresen effte gescheen is. Oek en willen wy unde unse frund nummende doer de herscap van Oldenborch unde uth der herscap laten reysen, Vrieslande laten to krenkene edder to beschedigende myd jenigerleye saken, sunder weer dat de vorbenante Oelryck unde syne frunde doer unse herscap effte uth unser herscap jemande to denste reysen wolde to voete edder to perde umme zoldie to vordenen, den willen wy unde unse frund unde scholen gunnende wesen weghe unde steghe vredeliken doer de herscap van Oldenborch to reysende in Vriesland. Weer aver dat jemant doer unse herscap elfte gebede reysen wolte to vote edder to perde, Vrieslande to krenckende, in last effte scaden to brengende, dat wyllen wy Gherd, greve vorbenant, unde unse frunde keren unde hinderen nun unde to ewigen tiiden. Alle desse vorscr, puncte samptlichen unde eyn itlick besunderen loven wii Gherd van Gotz gnaden greve vorscr. voir uns unde unse frund den erberen junckhern Oelrike vorben., synen frunden unde Vrieslande nu unde to ewygen tiiden stede, vast unde unvorbroken to holdene sunder jenigerleye insaghe, hulperede unde argeliist, unde hebben desses to merer kentnisse unde tueghe unse zeghel witlicke heten drucken upt spacium desses breffs Ghescheen unde vorhandelt des neysten donredages voir Pinxten. Hiir anne unde over hebbe ghewesen vor dedingesluede de ersamen Ilyes, droste to Oldenborch, Frederick van Schaghen, Wolter van den Bollen unde Johan van der Ollen, Borchard van Aschwede van unses junckhern Gherdes ziid, unde de ersamen her Niclaes, prior to Ezense, her Eylart, commenduer to Buersmoncken, her Albert to Hagen kerckhere, Tanne Kanckena to Witmunde hovetlingh, van junckher Oelryckes unde syner frunde siiden, de dyt vorhandelden unde mede deghedingeden. Anno etc. LI.
