| Nummer:oub0690 | Datum:2. Juli 1455 | Overlevering:Editie | Vindplaats:Ostfriesisches Urkundenbuch, I, S. 605, nr. 690 |
Testament und Klagen des Häuptlings Sibo Herringa zu Attemansburg und Silland.
In dem namen der hilligenn drefoldicheit. So betuige und do kundt ick Sibo Herringa, to Attemansborch und Sillandt[*] hovetlinck, dat ick min testament sette, und bevele Gade und sin leve moder und allenn hilligenn mine sele, unnd der erden minen lichnam, miner ehefrowen Insen achte koy, grass und how ut Attemansborch hertstede; noch 64 grase, so Tiade Popen brueket to Weierdenn, und oek min erve to Haskenborch.[*] Dit alles tidt eres levens; na orem afschede schall idt unser beider sone Herring hebben, alss dat ein recht ist, und bekenne oek, dat ick van wegen mins beddings vann eres vaders borchlande Rofhusen[*] und gudere nicht mer bolschattes entfangen hebbe, alss 83 1/2 grass, welck Manike Taden und Ede Wilts bruken; noch 14 hundert in Edtzertt wagendrivers stede, und dat dat smide so goett nicht en wass, alss se my togesecht hadden. Darvor hebbe ick to Insen besten van der moder 65 Davidtsgulden entfangen; item noch 2 fleekede ossen vor negen Postelattgulden, und oek anders nicht; und iss jo to klenn van sodanen borch, erven, lande und guder, replich und unreplich ein goder hande dochter mit to geven. Item ick clage Gott und alle sinen werden leven hilligenn, dat ick Folckert Boyngs und sinen sone Ede Boynges gene orsake gegeven hebbe, dat se min huess Attemansborch mit hulpe erer frunde scholden innemen, plunderen unde daelworpen, du ick to gaste wass, und mi nicht ensecht hadden, und minen schluter und stalknecht Edenn, und alle mine mansgesinde, so ick dargelaten, so jammerlick to ermorden, und will idt eme nicht nageven, so ick dat levent holde; sterve ick, so geve ick idt Gade, so wert he my noch recht darvor don moten. Up de herlicheit und dat gerichte van Sillandt hefft he nicht to clagen, iss my van older to older angeervet, als dat jederman bewust, und weet von der frundtschup nicht. Item bekenne oek, dat dat min broders Rieklef Herringa kindeskindt Houke, so an Ummen to Middoich[*] begeven, mit se gedelet hebbe, und hefft er vaderlike und angeervede landt van mi int Sillandt, Schortense[*] und ein deel bei erer moder erve to Sillenstede[*] entfangen, und sinnen also erflikenn vordragen. Wider hebbe ick mine meiers und inkumst beschreven alss idt recht iss, dar ick up leven unndt sterven will. To dem cluster tom Velde[*] geve ick mine beste ossen; noch 33 grase in unser leven Frowen ehre to Schortensen, so Lubbe Ensen brueket, und ditsulve hebbe ick mit beraden sinne gesettet, unnd will idt also halden hebben, und bidde to vorstender min swager Eibe to Butforde und Fulff Brinckssen. Tugen: Oneke Jaen, Lubbe Tiarts, Ewe Lutes, Berendt Hillen, Aylt Tanssen. To merer bevestung, hebbe ick den werdigenn hern, her Albert Froiden, Bremischer stiffts vicecommissarius, dit mit my to vorsegelen gebedenn; welckes ick herr Albert up begent des erwerdigenn unndt erbarenn Sibo Herringa hovetlings mit sinen angebornen und mit gewontlike anhengenden segell also versegelt hebben. Geschreven im jaire MoCCCCoLVo, am dage visitationis Marie.
