| Nummer:oub0702 | Datum:28. April 1456 | Overlevering:Editie | Vindplaats:Ostfriesisches Urkundenbuch, I, S. 614, nr. 702 |
Johann Kock, Bürger in Emden, pachtet von Beneko von Aurich den Warf, worauf das von ihm gekaufte Haus (oub0701) steht, für jährlich 2 Rheinische Goldgulden.
Witlick, kundich unde openbaer zii all den ghennen, de dessen breff zeen off horen lesen, wo ick Johan Kock, borgher in Emeden, bekenne unde tuge vor allesweme in crafft dessen breves, dat ick mit vrien willen, vorberaden modes, mit consente myner echten husvrouwen hebbe huerd unde hure yegenwordich in crafft desses breves to ener steden, vasten, ewighen hure, van deme beschedene manne Beneke van Auwerke syn werff, dar myn hyss nu tor tiid up steit, de dar is beleghen bynnen Emeden, dar Werneke Scroders hues zalgher dechtnisse by steit up de oesterziide, unde Remet Redertsna hues steit darby up de westerziid lieck yegenover de strate; also dat ick Johan vorscr, unde myne rechte erffnamen, boren off ungheboren, scholen unde willen up alle Paeschen komende gheven dessen vorbenomeden Beneken unde synen rechten erffnamen, boren off ungheboren, edder holder dessen breves, mit synen willen twe bescheden gulden enckede Rinsche gulden off payment erer weerde[*] sunder alle argelist, hulperede unde nye funde. Des to tuge hebben hiir an unde over ghewesen Hermen van Berghen, Werneke Scroder, Roleff Scroder, borghere in Emeden, unde anders vele gueder lude. In orkunde der warheit zo heb ick Johan vorscr. vruntliken ghebeden de ersame borghermestere in Emeden, als by namen Albert Tiideken, Johan van Winsen, Meio Tiadmersna unde Johan van Duthe; unde wy borghermesters vorbenant bekennen in desser scrifft, dat wy unse stadingesegel um bede willen Johan Kock vorscr. witliken hebben heten hanghen vor dessen breff. Screven na der bord Cristi MoCCCCo, darna amme yare van ses unde viftich, des midweken na Georgii martyris.[*]3)
