| Nummer:oub0730 | Datum:16. Mai 1458 | Overlevering:Editie | Vindplaats:Ostfriesisches Urkundenbuch, I, S. 633, nr. 730 |
Haye van Haren, genannt v. d. Papenborch, Propst zu Leer, huldigt dem Bischof von Münster nach geschehener Belehnung mit dem halben Hofe zu Leede im Kirchspiel Aschendorf und der Burg zu Papenburg.
Ick Haye van Haren genant van der Papenborch do kunt, als de erwerdige hogeborne furste myn genediger leve here, her Johan, phaltzgreve by Ryne, hertogh in Bayern unde confirmait to Munster, my beleent hevet mit dem halven have to Leede, unde mit syner genaden manleene unde apenen huze de Papenborch unde er tobehoringe, na lude syner genaden breves my darup gegeven, de van warden to warden hyr nabeschreven volget, aldus ludende
Wy Johan van Gots genaden, phaltzgreve by Ryne, hertough in Beyern unde confirmait to Munster, doen kont unde bekennen, dat wy belendt hebben unde belenen avermits desen breve Hayen van Haren, genant van der Papenborch, unsen proveste to Leer, mit den halven have to Leede, belegen in deme kerspele van Asschendorpe, in manstat unde mit unsen unde unses gestichtes manleene und openhuse der borch eder slottes de Papenborch, belegen in deme kerspele van Vollen, unde syner tobehoringe, tho rechten manleene unde openhuze, unss unde unses gestichtes vurscr. to allen unde itliken unsen nuoden, nutticheit, noden off gesynnen open to syne, tegen alle de gene eder warto wy, unse nakomelinge unde gestichte des to done hedden, kregen off begerden, sunder enige weygeringe unde indracht. Welke borch off slott vurscr. de vurscr. Haye ok van unsen vorfaren entfangen unde geholden hefft gehat. Hiirup hevet uns de vurscr. Haye huldinge unde eede gedaen, den guden sunte Pauwel, uns unde unser kercken unde gestichte truwe und holt to syne, unse beste to done unde argeste to kerene na al syner macht, als eyn guet getruwe man synen heren van rechte schuldich is, unde uns mit den vurscr. unsen leene unde openhuse gehorsam to syne als vurscr. steit unde nemande anders. Ok sal uns Haye vurscr. darvan helpen, als eyn guet man synen heren van syns unde syns gestichtes leene unde openhuse schuldich is to helpenn, sunder argelist. Hiir weren an unde aver unse reede, belenden manne unde getruwen Goesswyn Ketteler, Diderick van der Horst rittere, Albert Torck unde Johan Schenckinck. Desses to tuge hebn wy unse segel an dessen breff doen hangen. Gegeven in deme jare unses Heren dusent veerhondert achte unde vyfftich, des dinxedages na unses Heren hemmelvarts dage.
Also bekenne ick Haya (!) vurscr. vor nay unde myne erven, dat ick mynen genedigen heren gehuldiget unde lyffliken ton hilgen gesworn hebbe, huldige unde swere avermits desen breve, den guden sunte Pauwel, mynen genedigen heren vurscr., syner kerken unde gestickte van Munster, truwe unde holt to syne, de Papenborch to manleene unde apenen huse syner genaden unde gestichte vurscr, to holdene, unde darmede synen genaden gehorsam to syne in aller maten in des vurscr. myns genedigen heren breve hiir vor geschreven steit, unde vort alle unde itlike puncte desselves vurscr. breves my andreppende, stede, vast unde unvorbroken to holdende sunder enige wederrede unde indracht, unde love ok mede, dat myne erven dese vurscr. Papenborch unde gude ok van mynen genedigen heren, tor tiit bisscope to Munster, unde synen gestichte desgeliiken entfangen unde holden solen sunder indracht unde argelist; unde desses to tuge hebbe ick myn segel vor my unde myn erven an dessen breff gehangen. Gegeven in dem jare unses Heren dusent veerhondert achte unde vyfftich, des dinxedages na unses Heren hemmelvarts dage.
Wy Johan van Gots genaden, phaltzgreve by Ryne, hertough in Beyern unde confirmait to Munster, doen kont unde bekennen, dat wy belendt hebben unde belenen avermits desen breve Hayen van Haren, genant van der Papenborch, unsen proveste to Leer, mit den halven have to Leede, belegen in deme kerspele van Asschendorpe, in manstat unde mit unsen unde unses gestichtes manleene und openhuse der borch eder slottes de Papenborch, belegen in deme kerspele van Vollen, unde syner tobehoringe, tho rechten manleene unde openhuze, unss unde unses gestichtes vurscr. to allen unde itliken unsen nuoden, nutticheit, noden off gesynnen open to syne, tegen alle de gene eder warto wy, unse nakomelinge unde gestichte des to done hedden, kregen off begerden, sunder enige weygeringe unde indracht. Welke borch off slott vurscr. de vurscr. Haye ok van unsen vorfaren entfangen unde geholden hefft gehat. Hiirup hevet uns de vurscr. Haye huldinge unde eede gedaen, den guden sunte Pauwel, uns unde unser kercken unde gestichte truwe und holt to syne, unse beste to done unde argeste to kerene na al syner macht, als eyn guet getruwe man synen heren van rechte schuldich is, unde uns mit den vurscr. unsen leene unde openhuse gehorsam to syne als vurscr. steit unde nemande anders. Ok sal uns Haye vurscr. darvan helpen, als eyn guet man synen heren van syns unde syns gestichtes leene unde openhuse schuldich is to helpenn, sunder argelist. Hiir weren an unde aver unse reede, belenden manne unde getruwen Goesswyn Ketteler, Diderick van der Horst rittere, Albert Torck unde Johan Schenckinck. Desses to tuge hebn wy unse segel an dessen breff doen hangen. Gegeven in deme jare unses Heren dusent veerhondert achte unde vyfftich, des dinxedages na unses Heren hemmelvarts dage.
Also bekenne ick Haya (!) vurscr. vor nay unde myne erven, dat ick mynen genedigen heren gehuldiget unde lyffliken ton hilgen gesworn hebbe, huldige unde swere avermits desen breve, den guden sunte Pauwel, mynen genedigen heren vurscr., syner kerken unde gestickte van Munster, truwe unde holt to syne, de Papenborch to manleene unde apenen huse syner genaden unde gestichte vurscr, to holdene, unde darmede synen genaden gehorsam to syne in aller maten in des vurscr. myns genedigen heren breve hiir vor geschreven steit, unde vort alle unde itlike puncte desselves vurscr. breves my andreppende, stede, vast unde unvorbroken to holdende sunder enige wederrede unde indracht, unde love ok mede, dat myne erven dese vurscr. Papenborch unde gude ok van mynen genedigen heren, tor tiit bisscope to Munster, unde synen gestichte desgeliiken entfangen unde holden solen sunder indracht unde argelist; unde desses to tuge hebbe ick myn segel vor my unde myn erven an dessen breff gehangen. Gegeven in dem jare unses Heren dusent veerhondert achte unde vyfftich, des dinxedages na unses Heren hemmelvarts dage.
x
| Fonds | Ostfriesisches Urkundenbuch, I |
|---|---|
| Fol.nr. | S. 633 |
| Nr | 730 |
| Olim | Orig. im K. Staats-Archiv zu Münster. Fürstenthum Münster. Urk. Nr. 1790. |
| Jaar | 1458 |
| Datumcode | MpAscDom |
x
| Commentaar | Das Siegel enthält einen rechtsaufgerichteten Löwen mit der Umschrift: S. Ha . . tor Papeborch. |
|---|