Die Häuptlinge Tanno Duren zu Jever, Lubbo Onken zu Knyphausen und Alko zu Inhausen erklären sich bereit, ihren Streit mit Junker Ulrich und Sibo durch die Schiedsrichter von Hamburg und Bremen entscheiden zu lassen.
Wy Tanne Duren to Jever, in Oestringhen unde Wangherlande etc., Lubbe Onneke to Kripensen unde Alke to Inhusen hovetlinghe bekennen unde betughen opembare in desseme breve vor uns unde unse erven, ist wy sodannen unwillen, schele unde twidracht, alz twischen uns van der enen, unde juncheren Olryke to Gretsyle, Norden etc. unde Siben, sineme oeme to Dornum unde Esensen etc van der anderen syde, hovetlingen, is wesende, hebben eendrachtlyken van uns ghegeven unde de schele vord by de ersamen rede der stede Bremen unde Hamborg vulmechtich ghesath, uns beiden parte na inneholde unser claghe unde antworde, de wy den ersamen heren, heren Johanne Vresen, her Frederike Grunde, her Hinrike Lopoeuwe unde her Johanne Gherwens, nu der vorscr. twier rede sendeboden, hyrtho uthgesand, in scriften vorsegeld overghegeven hebben, myt rechte tho vorschedene; unde wes de genanten twe rede Bremen unde Hamborg in desser sake mit rechte schedende unde uthseggende werden, loven wy Tanno, Lubbe unde Alke vorbenant vor uns unde unse erven unde vor de ghenne, den de unwille mede todrepen mach, den vorgherorden reden Bremen unde Hamborg in guden truwen stede, vast unde unvorbroken sunder alle behael, nyge vunde unde argelist wol to holdene. Des to tughe so hebben wy Tanne, Lubbe unde Alke vorben. vor uns unde unse erven unde vor de, den de unwille mede todrepen mach, unse rechten ingesegele witlyken to desseme breve hethen hanghen. Nae Cristi gebord veerteynhundert yar, darnae in deme neghen unde voftigesten jare, ame daghe beati Magni episcopi.
x
| Edities |
E. Friedländer, Ostfriesisches Urkundenbuch I (Emden 1878), nr. 747 |
