| Nummer:oub0761 | Datum:20. Juni 1460 | Overlevering:Editie | Vindplaats:Ostfriesisches Urkundenbuch, I, S. 657, nr. 761 |
Zeugniss vor dem Propst und Pfarrer Thammo zu Weener von einer Reihe Bauern daselbst über die Zugehörigkeit der „Meenlande“ zu diesem Orte, welche von Bunde aus für sich in Anspruch genommen wird.
Ik Thammo, provest unde kercheer tho Wener, bekenne und betughe openbair in dessen breve vor allen guden luden, de den seen ofte horen lesen, dat vor my synt ghewesen in jeghenwordicheyt heer Gerldes, prester tho Wener, unde heer Gheerdes vicarii darsulves, olde beschedene unde ervarne mans, alz Renteko Emkens, Hero Fosskens, Alryk Tiaberns, Wyart Hyssekens, Ameso Krummens, Haio Tamkens, Ulfart Emkens, Popink Frederyk, Heer Tadykens, Okko Tyddekens, Esso by luden (?) und anders guder lude ghenoych, alle kerspellude to Wender (!), claghende, woe eyn deels guder manne toe Bonde dessulves erghenomed kerspels tho Wener meenlande synt anvechten und denken affthonemen, welk ergen. meenland dat vorg. kerspel tho Wener hefft gebrukt, de olste myt den junghesten, all oer leven, sonder enigerley aensprake offte klage by tyden junker Keno, junker Occo, Focko, junker Edzard, den alle Godt genade, und der Hamborger, dat de vorg. personen gemenelyke hebben bekant staen und will bekennen, wer und wor des noet und behoeff is vor all den geenen, de des tho rechte komen will, und dat in allen punten, es vorg. ys, gethuget ganslyck wahr tho wesen by salicheit oirer seelen; und hebbet vorder by dersulver warheit voor my Thammen vorg. denselven ergenomden prester jegenwohrdich bekant, dat se dycke und vaeke by tyden Hayko Deddes, Rentke Weyardes, Egsyn und anders gueder lude, in vortyden der oversten tho Bonde, und ock syet den tyden, oire besten op denselven ergen. meenlanden hebben geschuttet, unde den torff, den se gegraven hadden, gevoert tho Weener, dat de ehrgen. Bunder in den tyden nicht entegen en spreken, sonder ohr besten mit vrendschappen wedder losseden, eer der tyt, as uthwyset de breff des ehrwerdigen mans junker Olricks hoevetlinck in Ostfriesland, de den vorg, kerspel tho Weener, angesehen dat recht, was dat eergenomede meenland hefft in rechte thogescheiden, nu de Bunder gansslyck sonder alle anclagen daraff gewyset. Oek hebbe ick Thammo vorg., kerckheer tho Weener, drade wal vyfftich jahr vor datum desses breves tho Weener prester gewesen und hebbe nie gehort anders, den dat eergenomde meenlande sonder jenigerhande twyvel horde tho Weener. In eine orconne und getuych der warheyt aller punte vorgeschreven hebbe ick Thammo vakegenomt myn ingesegel wyttlyck doen hangen an desen breff. Anno Domini millesimo quadringentesimo sexagesimo, feria, sexta post octavam corporis Christi.
