Der Häuptling Ulrich von Greetsiel usw. und die Bürgermeister von Emden bezeugen, dass die Gebbe zu Emden ihrer Mutter Ewese und ihren Geschwistern ihr väterliches Erbtheil überlassen habe.

Wy Olrick, to Gretziill, Norden, Auwerke, Emeden, Berum etc., in Oestvreslande hovetling, Meyo Tiadmersna, Nomo Meckena unde Johann van Lynge, borgermesters to Emeden, bekennen unde betugen apembaer in krafft dusses bezegelden breves vor allen erbaren guden vromen luden, de ene zeen ofte horen lezen, dat vor uns gekomen is Ghebbe, zelgen Conen dochter to Emden, apembaer liende unde bekennende, wo ze myd guden vrigen willen unde vorbedachten mode, bii sonden mechtighen lyve, umbedwungen gande, stande, etende und drynkende, hadde overgedregen, upgelaten unde gegeven, drecht over, let up unde ghifft tegenwordich vormyddes macht dusses breves an ener rechten, steden, vasten, ewigen gave, Evesen erer modere tovoren, unde eren broderen unde susteren, de nu leven unde hiir namaels geboren werden mochten, alle de gudere unde erffnysse, bewechlick unde umbewechlick, kleyn, groet, wodanych de gestald synt, bynnen offte buten Emeden gelegen, de der genanten Ghebben van dem vorscr. erem zelgen vader angeervet synt unde ock in nakomen tiiden angeervet werden mochten. Also offt zake were, dat Ghebbe ergescreven vorstorve, edder erer to kort worde, so mogen uende schollen de vilgenanten Evese, er modere, myd Ghebben susteren unde broderen unde eren erven, boren unde ungeboren, sodane vorscreven erffnysse unde gudere bisitten, bruken, hebben unde holden, vorsetten, vorkopen, eren erven vordan to ervende, na alle erem willen, nutticheyt unde orbere, darbii vort to varende unde to donde sonder zelgen Conen vrunde offte jemendes van synere wegen jengerleye rechte bisprake gheystlikes unde wartlikes rechts, alle nye vunde, intoghe unde hulperede, de men uth den vorscreven rechten hiir entegens vynden unde zoken mochte, utgespraken unde neder gelecht. Hiir hebben vor tugeslude mede bii an unde over gewesen, de darto gebeden unde geropen worden, de vromen mans Jitse Kensna to Emden, Arnd Kreyll to Marienhove, Eggerck Beyenvleet up Lherord, vogede, olde Johan Gesens, Carsten Cicebuttel, Bernhardus van Lynge, Remeth Redertsna, Nanno Honnekena unde Hompo Hayena, to Emeden borgers. In eyn tuchnysse merere warheyt, so hebben wy Olrick vorgescr. unse grote zegell, unde wii borgermestere ergenant der stad Emeden ingesegel, dat wii van bevell unde macht des ergescreven unses gnedigen leven juncheren to brukende plegen, an dessen breff doen hangen. Na Godes bord dusent veerhundert veer unt sestich, des vrigdages na sunte Peter in den banden.

x

x

Fonds	Ostfriesisches Urkundenbuch, I
Fol.nr.	S. 695
Nr	802
Olim	Orig. im Besitze der Gesellschaft für bildende Kunst etc. zu Emden.
Jaar	1464
Datumcode	VpVinPet

x

x

Commentaar	Das gewöhnliche Siegel Ulrich’s ist gut erhalten, es enthält ein Wappenschild mit der Harpyie und den 4 Sporenrädern, Helm mit der Lilie als Helmschmuck. Umschrift: S. Ulrici capitalis in Norda et alias. Das zweite Siegel fehlt.

x

Materiaal	papier

x

Edities	E. Friedländer, Ostfriesisches Urkundenbuch I (Emden 1878), nr. 802