| Nummer:oub0827 | Datum:18. Juni 1465 | Overlevering:Editie | Vindplaats:Ostfriesisches Urkundenbuch, I, S. 715, nr. 827 |
Poppeko Reidis bekundet einen Zwist des Klosters Langen mit Kampo zu Woltesterburg wegen eines Erbes ins Weerdermönker Hammrich, welches dem Syweke gehört hatte.
Ik Poppeko Reydis enkenne vor alsweme[*] de dessen breff synt horen edder lezen, dat vor my is ghewezen Kampo to der Wolderseborch, ende stonde da den provest to Langhen, heren Nycolaus, dat erve, dar Syweke goder dechtenisse plach to bruken ende vaghen in Wyrdyrmoneke hamryck, des de vorbenomede erwerdeghe provest, her Nycolaus, wunnen hadde aff myt goden rechte den Syuken vorscr.; dyt vorbescreven erve wolde wedderkopen Campo van den provest ende van den conventesluden, so dat se des nycht mochten vorendeghen unde vordraghen des kopes to hores beyde noghe ende wylle etc. Hiir over in mede wezet her Vrederyck, in vortyden provest to Langhen, ende her Jacop, canonicus aldar, ende ander gode lude, bynamet Clawes, Syrck, ende ock ander lude, de in dessen konen nycht al wezen byscreven. Desser to groter sekerheyt ende to groter tughenisse scryftis unde breves hebbe ik Poppeke Reydes vorscr. mynen inghesegel mit weten an desse spacien ghedrucket. In den jare MoCCCCoLXVo, uppe den dach Marci et Marcelliani martyrum.
